Се бозии дӯстонаи тими мунтахаби футзали Тоҷикистон бо Ӯзбекистон дар моҳи июл

Душанбе, 5.07.2016 /АМИТ «Ховар»/. Дастаи мунтахаби футзали Тоҷикистон бо мақсади гузаронидани се бозии дӯстона бо мунтахаби футзали Ӯзбекистон марҳалаи омодагиро дар шаҳри Душанбе оғоз кард. Сармураббии даста Ҳусейн Шодиев 14 нафар бозингаронро барои ин вохӯриҳо даъват кардааст, ки 7 нафарашонро аъзоёни клуби  «ДИСИ Инвест»  ташкил мекунанд.
Дар қиёс бо ҳайати дастае, ки моҳи феврал  дар бозиҳои ниҳоии Ҷоми Осиё иштирок карда буд, ҳайати мунтахаби мамлакат тағйир ёфтааст. Футболбозони нав  Умед Қӯзиев аз «ДИСИ Инвест», Умед Мирзораҳимов аз «Сипар» ва Фирӯз Сангов аз «Соро Компания» ҳайати дастаро комил кардаанд.
Ба ҳамин тариқ ҳайати дастаи мунтахаби футзали кишвар дар бозиҳои дӯстона бо мунтахаби Ӯзбекистон, ки 12, 13 ва 14 июл дар шаҳри Тошканд мегузаранд, чунин аст:
Дарвозабонҳо: Фирӯз Бекмуродов («ДИСИ Инвест»), Муродулло Алиқулов («Газпром»);
Бозинагрони майдон: Муҳаммад Раҳмонов, Дилшод Саломов, Собирҷон Гуляков, Раҳмоналӣ Шарифов, Шавкат Ҳалимов, Умед Қӯзиев (ҳама аз «ДИСИ Инвест»), Мансур Мамедбобоев («Бонки миллӣ»), Меҳрубони Тиллозода («Газпром»), Некрӯз Алимаҳмадов, Файзалӣ Сардоров (ҳарду аз «Карон»), Умед Мирзораҳимов («Сипар»), Фирӯз Сангов («Соро компания»).