«Старекс» дар дарёи Панҷ ғарқ шуд

Душанбе, 20.07.2016. /АМИТ «Ховар»/. 19 июли соли равон тахминан соати 08:00 ронандаи мошини тамғаи  «Опел-Вектра», марди 27-солаи сокини ноҳияи Рӯдакӣ ҳангоми ҳаракат аз самти Душанбе дар ҳудуди деҳаи Болошаҳри ноҳияи Рӯдакӣ духтарчаи 4-соларо, ки роҳро убур мекард, пахш намудааст.
Дар натиҷа пиёдагарди хурдсол ҷароҳати вазнини ҷисмонӣ бардошта, дар ҷойи ҳодиса ба ҳалокат расидааст.
Дар ноҳияи Дарвоз низ як садамаи нохуши нақлиётӣ рух дод. Ронандаи мошини тамғаи «Старекс», марди 55-солаи сокини ноҳияи Дарвоз ҳангоми ҳаракат аз самти   Хоруғ ба самти  Душанбе, дар деҳаи Рӯзвайи ноҳияи Дарвоз аз уҳдаи идораи воситаи нақлиёт набаромада, мошинро ба чуқурии 25 метр чаппа намуда, дар дарёи Панҷ ғарқ шудааст.
Дар натиҷа худи ронанда ҷароҳати вазнини ҷисмонӣ бардошта, мусофири дохили мошин, зани 46-солаи сокини шаҳри Хоруғ бо бардоштани ҷароҳати вазнини ҷисмонӣ дар ҷои ҳодиса ба ҳалокат расидааст.
Дар ин бора аз Вазорати корҳои дохилии ҶТ ба АМИТ «Ховар» хабар доданд.