Таҷлили Рӯзи маъюбон дар ноҳияи Б. Ғафуров

Душанбе, 8.07.2016 /АМИТ «Ховар»/.  7- уми июл бо дастгирии Мақомоти иҷроияи ҳокимияти давлатии ноҳияи Бобоҷон Ғафуров дар тӯйхонаи «Ёдгорҷон»-и ҷамоати шаҳраки Ғафуров бахшида ба Рӯзи маъюбон чорабинии фарҳангиву фароғатӣ доир гардид ва  дар он барои 150 нафар сокинони имконияташон маҳдуд дастурхони идона ороста шуд.
Раиси ноҳияи Зариф Назирӣ изҳор намуд, ки ҳеҷ як қишри ҷомеа аз ғамхориву парасторӣ ва дастгирии давлату ҳукумат берун нест ва намемонад. Мақомоти иҷроияи ҳокимияти давлатии ноҳияи Бобоҷон Ғафуров пайваста ба оилаҳои камбизоат ва кӯдакон, махсусан ба нафарони ниёзманд ғамхории доимӣ ва сарпарастӣ карданро дар мадди назар мегузорад.
Ҳамчунин, аз ҷониби бахши фарҳанги ноҳия ва сарояндаҳои шинохта барои дар рӯҳияи идона ҷашн гирифтани Рӯзи маъюбон консерти идона баргузор гардид.