Дастаи «Истиқлол» ба дарёфти панҷумин унвони чемпионӣ наздиктар шуд

Душанбе, 14.10.2016. /АМИТ«Ховар»/. 15 октябр дар Варзишгоҳи марказии пойтахт бозии навбатии дастаи футболи «Истиқлол»-и Душанбе бо дастаи «Регар-ТадАЗ»-и шаҳри Турсунзода баргузор мешавад.
Ёдовар мешавем, ки дар бозии мавқуфгузоштаи даври 18-уми мусобиқаи Лигаи олии футболи мамлакат дастаи «Истиқлол»-и Душанбе тими «Парвоз»-и ноҳияи Бобоҷон Ғафуровро бо ҳисоби калони 8 бар 2 мағлуб кард.
Бино ба маълумоти сомонаи расмии дастаи «Истиқлол», дар вохӯрӣ бозингар ва ҳамлагари дастаи мунтахаби футболи Тоҷикистон Манучеҳр Ҷалилов ба дарвозаи ҳариф 5 тӯб зада, шумораи голҳояшро дар мавсими имсолаи чемпионат ба 20 адад расонид.
Акнун барои бори панҷум ноил гардидан ба унвони чемпиони мавсими имсолаи Лигаи олии футболи мамлакат ба дастаи «Истиқлол» гирифтани 4 имтиёз дар 3 бозии боқимонда кофист.