Имрӯз-Рӯзи умумиҷаҳонии мубориза бо бемории илтиҳоби буғумҳо: як сабаби ин намуди беморӣ пурхӯрист!

Душанбе, 12.10.2016 /АМИТ «Ховар»/. Рӯзи умумиҷаҳонии мубориза бо бемориҳои илтиҳоби буғумҳо ҳамасола 12 октябр ҷашн гирифта мешавад. Ин рӯз аз соли 1996 бо ташаббуси Ташкилоти умумиҷаҳонии тандурустӣ ба роҳ монда шудааст. Мақсади асосии ин рӯз ҷалби диққати ҷомеаи ҷаҳонӣ нисбат ба бемориҳои тарбод, муттаҳид намудани кӯшишҳои табибон, беморон ва аҳолӣ дар масъалаи пешгирӣ, ташхис ва табобати ин беморӣ мебошад.

Тавре ки духтури тарбодшинос, номзади илмҳои тиб, духтури дараҷаи олӣ Насиба Ахунова иброз намуд, артрит чанд намуд мешавад.
«Масалан, артрити тарбодмонанд ва реактивӣ дар Тоҷикистон зиёд мушоҳида мешавад. Артриди тарбодмонанд бемории бофтаҳои пайвандист, ки бо осеби буғумҳои хурд падид меоянд. Дар натиҷаи ин беморӣ каҷшавии буғумҳо ба назар мерасад. Аз ҳамаи бемориҳои тарбодӣ 10 фоизро артрити тарбодӣ ташкил медиҳад. Фарқи артрити реактивӣ аз тарбодӣ дар он аст, ки дар ин беморӣ бештар буғумҳои калон, зону, банди по осеб меёбанд. Ба ин беморӣ бештар мардони аз 25 то 35 — сола гирифтор мешаванд. Омилҳои ин беморӣ вирусҳои зуком, сурхча, хунукхӯрии аз ҳад зиёд мебошанд»,-илова намуд Насиба Ахунова.
Ба гуфтаи табиб, сабаби ин беморӣ тонзиллит ва бемориҳои урогенӣ мебошанд. Ҳангоми табобат накардани ин бемориҳо он ба артрити реактивӣ оварда мерасонад.
«Артрити тарбодмонанд чанд марҳилаи табобат дорад. Имрӯзҳо бештари беморон ҳангоми дарди буғумҳо аз малҳам ва доруҳое, ки аз тариқи телевизион намоиш дода мешаванд ва ё дар дорухона тавсия медиҳанд, истифода мебаранд. Ҳангоми илтиҳоби буғум ҳатман бояд ба духтур муроҷиат кард. Маводи нистироиди ғайриилтиҳобӣ гуногун буда, барои ҳар бемор ҳар гуна таъсир мерасонанд»,- бо таассуф баён намуд тарбодшинос.
Ба андешаи мутахассис дар панҷ соли охир навъи остеоартроз хеле зиёд ба назар мерасад. Бештар бемор аз дарди бандҳои пой, зонуҳо, косу ронҳо, ангушти якуми пой шикоят мекунад.
«Ин дардҳо хосияти механикӣ дошта, ҳангоми ором будан дард ҳис карда намешавад ва танҳо ҳангоми ҳаракат дард авҷ мегирад. Солҳои охир ба ин беморӣ занони аз 40 -сола боло дучор мешаванд. Зиқшавӣ, истеъмоли нодурусти хӯрок, пурхӯрӣ, истеъмоли хӯрокҳои равғанӣ, гӯштӣ ба бемории ниқрис (подагра ), ки як нави артрит аст, оварда мерасонад. Ин беморӣ низ байни мардони аз 30- сола боло ба қайд гирифта мешаванд. Дар ин беморӣ дардҳо хусусияти даврзанӣ доранд»,-зикр намуд Насиба Ахунова.
Ҳангоми дарди буғумҳо бемор бояд ҳатман ба духтур муроҷиат кунад. Бояд танҳо дору ва малҳамҳои тавсияшударо истеъмол кунанд. Агар бемор бе таъйиноти духтур маводҳои дорувориро истеъмол кунад, он ба меъда метавонад таъсир расонад. Барои ҳамин духтурони ботарҷриба ҳангоми таъйини чунин доруҳо боз доруҳои ба меъда таъсиркунандаро якҷоя тавсия медиҳанд.
Бино ба гуфтаи Муллозуҳур Тоҳирӣ, дар Тоҷикистон осоишгоҳҳои зиёде ҳастанд, ки дар он ҷо бемориҳои артрит муолиҷа мешаванд.
«Яке аз беҳтарин осоишгоҳ барои табобати ин навъи беморӣ — ин Хоҷа Обигарм мебошад. Дар он ҷо ба беморон чанд намуди буғу обҳо тавсия дода мешавад. Дар ноҳияи Айнӣ осоишгоҳи ман низ фаъол мебошад, ки бештари беморони буғумдард барои муолиҷа ба он ҷо меоянд»,-зикр намуд Муллозуҳур Тоҳирӣ.

Л.Қосимова