Чаро «Истиқлол» дар Лигаи чемпионҳои Осиё ширкат намекунад?

Душанбе, 23.11.2016 /АМИТ «Ховар»/. Саволи «Чаро чемпиони Тоҷикистон-дастаи «Истиқлол»-и Душанбе дар бозиҳои Лигаи чемпионҳои Осиё ширкат намеварзад?» мавзӯи пурбаҳсеро дар миёни мухлисони футболи Тоҷикистон бар ҷой гузоштааст. Аз ин рӯ АМИТ «Ховар» барои ба ин савол ҷавоб гирифтан ба Директори Лигаи футболи Тоҷикистон Алишер Урунов муроҷиат кард.
«Сабаби асосии иштирок накардани КФ «Истиқлол» дар бозиҳои Лигаи чемпионҳои Осиё он аст, ки «Истиқлол» барои дар ин мусобиқаи бонуфуз иштирок кардан то 1 августи соли равон бояд аз комиссияи литсензионии КФО мегузашт, аммо таъхир дар ин масъала сабаби он гардид, ки «Истиқлол» имсол низ дар бозиҳои Ҷоми КФО иштирок мекунад», -шарҳ дод Алишер Урунов.
Аз рӯи раддабандии КФО натиҷаи ҳунарнамоии футболбозони Тоҷикистон ҷавобгӯ ба бозиҳои Лигаи чемпионҳои Осиё аст. ФФТ умед дорад, ки дар сурати ба нишондиҳандаҳои боз ҳам беҳтар ноил гаштани футболи Тоҷикистон соли оянда дастаҳои кишварамон мустақиман дар бозиҳои Лигаи чемпионҳои Осиё ширкат меварзанд.
Ба ҳамин тартиб, дастаи «Истиқлол»-и Душанбе 13 декабри соли равон баъди қуръакашии бозиҳои гурӯҳии Ҷоми КФО дар мақомгоҳи ниҳоди футболи Осиё-дар Малайзия ҳарифони худро маълум хоҳад кард.
Дастаи «Ҳосилот»-и Фархор-соҳиби медалҳои нуқраи мавсими соли 2016 дар бозиҳои даври «плей-офф»-и Ҷоми КФО ҳунарнамоиашро оғоз мекунад.