Шоҳмотбози норвегиягӣ Карлсен аз нав чемпиони ҷаҳон оид ба шоҳмот гардид

Душанбе, 01.12.2016 /АМИТ «Ховар»/. Шоҳмотбози норвегиягӣ Магнус Карлсен аз нав чемпиони ҷаҳон оид ба шоҳмот гардид. Ӯ ҳарифи худ Сергей Карякини русро дар бозӣ барои унвони чемпионӣ мағлуб кард. Дар ин бора агентии «Лента.ру» хабар додааст.
«Аз 11 то 28 ноябр дар 12 бозии байни ин шоҳмотбозон натиҷаи мусовӣ ба қайд гирифта шуд. Аммо аз 4 бозии рапид (25 дақиқаву 10 сония барои як гашт)  Магнус Карлсен дар дутоаш ғолиб омада, соҳиби унвони чемпионӣ ва маблағи 600 000 доллари амрикоӣ гардид»,- иттилоъ медиҳад манбаъ.
Ба ҳамин тартиб, Магнус Карлсени 26- сола  унвони чемпиониро, ки соли 2013 ба даст оварда буд, аз нав ҳимоя кард.