Ду рекорди нав дар мусобиқаи «Australian Open» оид ба теннис

ДУШАНБЕ, 18.01.2017/АМИТ «Ховар»/. Дар даври якуми мусобиқаи кушоди теннисбозон дар «Australian Open» теннисбози хорватӣ Иво Карлович ва Орасио Себалосаи аргентинагӣ ду рекорди нави мусобиқаро гузоштанд. Дар ин бора сомонаи расмии Australian Open хабар медиҳад. Бозии байни ин теннисбозон 5 соату 14 дақиқа идома ёфта, бо пирӯзии Иво Карлович бо натиҷаи 6:7 (6:8),3:6, 7:5, 6:2, 22:20 ба анҷом расид. Теннисбозон рекорди ин мусобиқаро дар ҳисоби геймҳо тағйир доданд (42, 22:20). Пештар ин дастовард ба бозингарон Энди Роддики амрикоӣ ва Юнус Алайнавии марокашӣ мансуб буд (40, 21:19).
Аз тарафи дигар Карлович дар задани эйсҳо ҳам рекордро дигар кард (75). Ин нишодод қаблан ба теннисбози шведӣ Йоахим Юханссон мансуб буд (51). Ӯ дар муқобили Андре Агассии амрикоӣ ба чунин дастовард муваффақ гардид.
Аз ҳама бозии дарозтарин дар таърихи мусобиқаи Australian Open ба вохӯрии финалии теннисбозон дар соли 2012 миёни Новак Ҷоковичи серб ва Рафаэл Надали испанӣ рост меояд, ки он ба 5 соату 53 дақиқа баробар шуда буд (5:7, 6:4, 6:2, 6:7, 7:5).