Имрӯз дар Варзишгоҳи марказӣ иди калони футбол барпо мегардад!

ДУШАНБЕ, 31.01.2017/АМИТ «Ховар»/. Имрӯз дар варзишгоҳи марказии пойтахт иди калони футбол барпо мегардад. Чемпиони Афғонистон «Шоҳин Асмоӣ» ба ҳайси мизбон барандаи медалҳои нуқраи чемпионати Тоҷикистон- «Ҳосилот»-и Фархорро дар доираи бозиҳои плей-оффи Ҷоми Конфедератсияи футболи Осиё (КФО) қабул мекунад. Бозӣ соати 15:30 оғоз мешавад.
«Шоҳин Асмоӣ» дар таърихи футболи Афғонистон ҳамчун чемпион бори аввал дар мусобиқаи бонуфузи футболи Осиё иштирок мекунад. «Ҳосилот»-и Фархор низ ба ин мартаба бори аввал расидааст. Тибқи пешгӯии мутахассисони соҳаи футбол «Ҳосилот» имкон дорад бо дастгирии мухлисони сершумораш аз натиҷаи ду вохӯрӣ, ки дуюмаш низ дар ҳамин майдон 7 феврал мегузарад, ба бозиҳои ояндаи плей-офф гузарад.
Дар робита ба бозиҳои нахустини плей-оффи Ҷоми КФО дирӯз дастаҳои «Шабоб Алхалил»-и Фаластин бар «Алсувақ»-и Уммон бо натиҷаи 2:1, «Ҳоум Юнайтед»-и Сингапур бар «Пномпен Кроун »-и Камбоҷа дар сафар бо натиҷаи 4:3 ғолиб омаданд.
Имрӯз ҳамчунин дастаҳои «Дордой»-и Қирғизистон бо «Балкан»-и Туркманистон, «Коломбо» -и Шри Ланка бо «Моҳун Баган»-и Ҳиндустон ва «Симпу Сити»-и Бутан бо «Валенсия»-и Малдив вориди рақобатҳои аввалин мешаванд.