«Реал» ба хотири мусулмонҳо нишонашро дигар кард

ДУШАНБЕ, 26.01.2017/АМИТ «Ховар»/. Клуби футболи «Реал»-и Мадрид ба хотири таҳқир накардани мусулмонҳо ба қароре омад, ки нишонашро (эмблема) дар маҳсулоти истеҳсолшаванда дигар кунад. Дар ин бора Reuters хабар медиҳад.
Сабаби асосии дигар кардани нишон- ин ҷой доштани салиб дар болои тоҷ ба шумор меравад. «Реал» ҳамкориашро бо ширкати «Marka», ки ҳуқуқи истеҳсоли маҳсулотро бо нишони «Реал» дар кишварҳои Шарқи наздик ба роҳ мондааст, вусъат медиҳад. Тибқи шартнома бо ин ширкати бонуфуз клуби шоҳона розӣ шудааст салибро аз тоҷ бардорад.
«Дар кишварҳои халиҷи Форс нисбат ба салиб бо эҳсосот муносибат мекунанд. Аз ин рӯ боэҳтиёт амал бояд кард»,-гуфтааст ноиби президенти ширкати «Marka» Халид Алмаҳейрӣ.
Салиб танҳо аз нишони дар маҳсулот ҷойгиршаванда гирифта хоҳад шуд. Нишони клуб ҳамон тавре ки буд, боқӣ мемонад.
«Реал» яке аз клубҳои беҳтарини Испания ва ҷаҳон муаррифӣ мешавад. Ин даста соҳиби 60 ҷоизаи футболи Испания ва 11 Ҷоми чемпионҳои Аврупо мебошад. Федератсияи байналмилалии футбол (ФИФА) «Реал»-ро беҳтарин клуби футболи ҷаҳон эълон кардааст.