«Барселона» истеъфои сармураббиро мехоҳад

ДУШАНБЕ, 17.02.2017. /АМИТ «Ховар»/. Бозингарони клуби футболи «Барселона» аз сармураббии даста Луис Энрике қаноаманд набуда, хоҳиши онро доранд, ки дар поёни мавсими футболи соли 2016-2017 ба истеъфо равад. Дар ин бора радиои испании COPE хабар медиҳад.

Аз рӯи хабари манбаъ, то бозӣ бо дастаи ПСЖ дар рақобатҳои 1/8 ниҳоии Лигаи чемпионҳои Аврупо футболбозони «Барселона» дар муҳити на он қадар хуб қарор доштанд ва ин сабаб гардид, ки даста бо натиҷаи 4:0 шикаст хӯрад. Шиддатноии дохили даста ба бозӣ таъсиргузор маънидод мешавад.

Сабаби асосии бохти калони «Барселона»-ро Луис Энрике дар худ дидааст.

Ёдовар мешавем, ки дар бозии рафти 1/8 ниҳоии Лигаи чемпионҳои Аврупо «Пари Сен -Жермен» бо ду голи Анхел ди Мария ва Юлиан Дракслер бо Эдвин Каванӣ «Барселона»-ро бо натиҷаи 4:0 шикаст доданд.

Бозии баргашт 8 март дар Барселона барпо мегардад.