Дастаҳои мунтахаби футзали Тоҷикистон ва Туркия бо ҳам вохӯрданд

ДУШАНБЕ, 22.02.2017/АМИТ «Ховар»/. Дастаи мунтахаби футзали Тоҷикистон аввалин бозии худро дар соли 2017 бо дастаи мунтахаби футзали Туркия гузаронид. Вохӯрӣ бо ғалабаи соҳибони майдон бо натиҷаи 5:4 анҷом ёфт.
Ин вохӯрӣ дар шаҳри Ялови Туркия дирӯз барпо гардид. Баъди нимаи аввали бозӣ футзалистони мо бо натиҷаи 3:2 дар сафи пеш буданд, аммо нимаи дуюм барои соҳибони майдон бобарор омад ва дар натиҷа бо ҳисоби 5:4 ғолиб омаданд. Голҳоро аз дастаи Тоҷикистон Некрӯз Алимаҳмадов (2-то), Меҳрубон Тиллозода ва Хуршед Маҳмудов ба ҳадаф расониданд.
Имрӯз бори дигар ин дастаҳо дар бозии дуюми худ вориди толор мешаванд.
Ёдрас мешавем, ки вохӯриҳои мазкур аз рӯи барномаи омодагии дастаи мунтахаби футзали Тоҷикистон ба бозиҳои интихобии Чемпионати Осиё, ки аз 13 то 22 октябр дар минтақаи Осиёи Марказӣ мегузарад, роҳандозӣ шудаанд.