Хуршед Маҳмудов футболро ба футзал иваз кард

ДУШАНБЕ, 09.02.2017/АМИТ «Ховар»/. Хуршед Маҳмудов, яке аз беҳтарин футболбозони тоҷик, ки сазовори беҳтарин унвонҳо дар футбол гардидааст, футболи калонро ба футзал иваз кард. Тавре сомонаи ФФТ хабар медиҳад, ин бозингари мумтоз шартномаи хубро бо клуби футзали «ДИСИ Инвест» ба имзо расонд ва минбаъд ҳунарнамоиашро дар футзал идома медиҳад.
Хуршед Маҳмудов, чемпиони ҳашткаратаи Тоҷикистон, соҳиби Ҷоми Тоҷикистон (4 маротиба), Ҷоми даъвати Конфедератсияи футболи Осиё (2006), Ҷоми Президенти КФО (3 маротиба), беҳтарин бозингари Ҷоми Президенти КФО (2008, 2009), бозингари беҳтарини Тоҷикистон (2005, 2006, 2008, 2011) буда, дар ҳайати дастаҳои «Варзоб»-и Душанбе, «Регар-ТадАЗ»-и Турсунзода ва «Барқчӣ» бозӣ кардааст. Узви дастаи мунтахаби Тоҷикистон аз соли 2004 мебошад.
Хуршед Маҳмудов собиқан дар ҳайати дастаи мунтахаби футзали Тоҷикистон ҳам бозӣ кардааст ва шояд ҳамон меҳр аст, ки имрӯз ба футзал рӯ овардааст.
«ДИСИ Инвест» чемпиони Тоҷикистон буда, соли равон дар бозиҳои байналмилалӣ ширкат меварзад.