Иштироки лижаронони тоҷик дар Бозиҳои VIII зимистонаи осиёӣ

ДУШАНБЕ, 17.02.2017. /АМИТ Ховар/. Аз 19 то 26 феврали соли равон дар шаҳри Саппорои Ҷопон Бозиҳои VIII зимистонаи осиёӣ баргузор карда мешаванд. Дар он варзишгарон аз 29 давлати Осиё, Австралия ва Зеландияи Нав иштирок менамоянд. Дар ин бора аз Кумитаи ҷавонон, варзиш ва сайёҳии назди Ҳукумати Ҷумҳурии Тоҷикистон ба АМИТ «Ховар» хабар доданд.
Варзишгарон аз рӯи 11 намуди варзиш, аз ҷумла биатлон, лижаронии кӯҳӣ, кёрлинг, скитинг, сноуборд, рақси рӯи ях, чавгонбозӣ ва ғайра байни худ рақобат хоҳанд намуд.
Тоҷикистонро варзишгарони кишвар дар ҳайати Соҳибназари Турсунмурод, Баракатулло Зокиров, Сайфиддини Низомиддин ва Баҳриддин Ғоибов аз намудҳои лижаронии кӯҳӣ дар ин бозиҳо муаррифӣ менамоянд.
Имрӯз, 17 феврал маросими парчамбардории Ҷумҳурии Тоҷикистон баргузор шуда, 21 феврал ҷаласаи қуръапартоӣ доир карда мешавад.
Айни замон варзишгарони мо дар меҳмонхонаи «APA Hotel» қарор дошта, ба сабқатҳо омодагӣ мебинанд. Онҳо 22-24 феврал аз намудҳои лижаронии кӯҳӣ рақобат мекунанд.
Ҳайати дастаи Тоҷикистон бо сарпарастии Ассотсиатсияи миллии намудҳои зимистонаи варзиши Тоҷикистон бо тамоми лавозимотти муосири варзишӣ таъмин гардида, бо маблағгузории ин Ассотсиатсия имкони иштирок дар ин мусобиқаи бонуфузро пайдо намуд.