Лигаи чемпионҳои Аврупо: Имрӯз аввалин бозиҳои 1/8- ниҳоӣ оғоз меёбанд

ДУШАНБЕ, 14.02.2017/АМИТ «Ховар»/. Имрӯз аввалин бозиҳои 1/8 -ниҳоии Лигаи чемпионҳои Аврупо баъди танаффус шурӯъ мегарданд. Клубҳои футболи ПСЖ бо «Барселона» ва «Бенфика» бо «Боруссия» вориди майдон мешаванд.

Коршиносони футбол муътақиданд, ки дар бозии аввал дар варзишгоҳи «Парк де Пренс»-и Париж КФ «Барселона» (80%) ба комёбӣ ноил мегардад.  Аз 9 бозие, ки ин дастаҳо бо ҳам гузаронидаанд, «Барселона» дар 4 вохӯрӣ ва ПСЖ дар 2 бозӣ ғолиб омадаанд. Се рақобати дигар мусовӣ анҷом ёфтаанд. Таносуби тӯбҳо бо ҳисоби  16-15 ба нафъи «Барселона» аст.

Дар бозии дуюми рӯз миёни дастаҳои «Бенфика»-и Португалия ва  «Боруссия»-и Олмон мутахассисон «Боруссия»-ро авло медонанд. Ин даста дар гурӯҳи «F» бо КФ «Реал» бе ягон бохт бо 14 имтиёз мақоми аввалро аз худ кард.

«Бенфика» ва «Боруссия» бо ҳам ду вохӯрӣ гузаронидаанд. Дар варзишгоҳи «Эстадо де Луз»-и Португалия «Бенфика» бар «Боруссия» бо нишондоди 2:1 дар бозиҳои Ҷоми чемпионҳои УЭФА (1963-1964) ғалаба карда, дар бозии баргашт дар Олмон бо ҳисоби 5:0 мағлуб шудааст.