Шаҳри Ӯш дастаи «Ҳосилот»-и Фархорро истиқбол кард

ДУШАНБЕ, 20.02.2017/АМИТ «Ховар»/. Шаҳри Ӯши Ҷумҳурии Қирғизистон барандаи медалҳои нуқраи Чемпионати Тоҷикистон-дастаи «Ҳосилот»-и Фархорро истиқбол кард. Футболбозони тоҷик барои гузаронидани бозии аввали плей-оффи Ҷоми Конфедератсияи футболи Осиё (КФО) бо дастаи «Дордой»-Қирғизистон ба ин шаҳр ҳозир шуданд. Сармураббии «Ҳосилот» Муҳаммадҷон Ҳабибуллоев 18 бозингар- 2 дарвозабон, 6 муҳофизатгар, 7 нимҳимоятгар ва 3 ҳамлагарро бо худ овард.
Ин вохӯрӣ 21 феврал, соати 15 ба вақти маҳаллӣ (14:00 ба вақти Душанбе) дар варзишгоҳи ба номи Аҳмадбек Суюнбоев оғоз хоҳад ёфт.
Бозии ҷавобии ин дастаҳо 28 феврал дар Варзишгоҳи марказии шаҳри Душанбе мегузарад. Аз рӯи натиҷаи ду вохӯрӣ дастаи ғолиб ба гурӯҳи «Д»-и Осиёи марказӣ, ки дар он дастаҳои «Истиқлол»-и Душанбе, Олтин Асир»-и Туркманистон ва «Алай»-и Қирғизистон қарор доранд, ҳамроҳ мешавад.

Ҳайати «Ҳосилот» дар бозӣ бо «Дордой»:

Дарвозабонҳо: Рустам Ризоев, Фатҳулло Бобоев;

Муҳофизатгарон: Содиқ Мӯсо (Гана), Ҳасан Рустамов, Сафаралӣ Каримов, Ойбек Абдуғаффоров, Хайрулло Азизов, Саидалии Сафаралӣ;

Нимҳимоятгарон: Сайриддин Ғаффоров (Ӯзбекистон), Акуффо Гершон (Гана), Иброҳим Рабимов, Муҳаммадҷони Ҳасан, Абдурасул Раҳмонов, Абдусамад Хоҷибоев, Шаҳзод Давлатов;

Ҳамлагарон: Агблей Ҷонс (Гана), Шодибек Ғаффоров, Наврӯз Рустамов.