Ширкати паҳлавонони тоҷик дар мусобиқаи «Grand-Prix Dusseldorf 2017»

ДУШАНБЕ, 27.02.2017/АМИТ «Ховар»/. Паҳлавонони Тоҷикистон дар мусобиқаи байналмилалии дзю-до «Grand-Prix Dusseldorf 2017» 24-26 феврал дар шаҳри Дюсселдорфи Олмон иштирок карданд.
Дар қатори 344 варзишгар аз 49 кишвари ҷаҳон ба Комроншоҳи Устопириён муваффақ гардид, ки мақоми ҳафтумро ишғол кунад. Ин натиҷаи беҳтарин дар байни гӯштингирони дзю-дои Тоҷикистон буд. Соли равон ин дуюмин мусобиқаест, ки аз рӯи қоидаҳои нав сурат мегирад. Ба ҳайати гӯштингирони мо Асадулло Тоҳиров (-66 кг), Акмал Муродов, Сафарбек Муродов (ҳарду 81 кг), Муртазо Аминов ( 90 кг) ва Абдулваҳҳоб Сатторов (-100 кг) шомил буданд.
Дар ҳисоби умумидастаӣ паҳлавонони Япония бо 16 медал (5 тилло, 4 нуқра ва 7 биринҷӣ) мақоми аввалро соҳиб шуданд. Гурҷистон бо 4 медал (2 тилло ва 2 нуқра) дуюм ва Русия бо 5 медал (2 тилло, 1 нуқра ва 2 биринҷӣ) сеюм шуданд.
Тоҷикистон дар ин нишондод бо як ҷои ҳафтум зинаи 27-умро аз худ кард.