Тартиби дархости иштироки дастаҳои Лигаи олӣ дар мавсими нав муайян шуд

ДУШАНБЕ, 16.02.2017/АМИТ «Ховар»/. Лигаи футболи Тоҷикистон тартиби дархости иштироки дастаҳои Лигаи олиро дар мавсими нави футбол муайян кард.
Тавре сомонаи расмии ФФТ хабар медиҳад, тибқи қарори Лигаи футболи Тоҷикистон (ЛФТ) аз 20 то 28 феврал аз рӯи ҷадвали тасдиқшуда дастаҳо имкон доранд рӯйхати бозингарони худро ба ЛФТ пешниҳод кунанд. Мувофиқи ин низом ба клубҳо имкон дода мешавад, ки бозингарони хориҷӣ (Легионер) ва футболбозони тоҷикистоние, ки дар дастаҳои хориҷ аз кишвар ҳунарнамоӣ доранд, бо «ITC» (International Transfer Certificate, сертификати байналмилалии гузариш) то 25 март ба ҳайати даста шомил кунанд.
Ёдрас мешавем, ки мавсими нави футбол дар Тоҷикистон аз 5 март оғоз меёбад ва бори аввал дар се марҳала гузаронида мешавад.