Дар шаҳри Ваҳдат мусобиқаҳо ва чемпионатҳои варзишӣ-сайёҳӣ доир мегарданд

ВАҲДАТ, 01.03.2017. /АМИТ «Ховар»/. Бо мақсади  дар сатҳи баланд таҷлил намудани  Соли ҷавонон  Маркази эҷодии кӯдакон ва наврасони шаҳри Ваҳдат  байни маҳфилҳои варзишӣ   мусобиқаҳо ва чемпионатҳои варзишӣ-сайёҳӣ оид ба гӯштини миллӣ, вазнбардорӣ, муай-тай, футбол, таэквондо, киокушинкай, баскетбол ва қуллабароӣ эълон намуд. Дар ин бора аз Маркази эҷодии кӯдакон ва наврасони шаҳри Ваҳдат  хабар доданд.

Сарвари муассисаи мазкур Зуҳро   Табарова  иброз намуд, ки «ҷавонони болаёқатро метавон мояи ифтихор ва сарбаландии миллати тоҷик  номид. Зеро онҳо тавассути тафаккури созандаву ахлоқи ҳамида метавонанд пайванди ногусастании наслҳо ва рӯҳи абадзиндаи аҷдодони бофарҳанги хешро зинда доранд ва асри тиллоии миллати худро эҳё намоянд. Ҷавонон муҳофизони боэътимоди Ватан, амнияти давлату ҷомеа, сарчашмаи ташаббусҳо ва захираи миллату давлат ҳастанд. Онҳо дар дигаргунсозиҳои  демокративу амалҳои созандаи Тоҷикистон такягоҳи боэътимоди давлат мебошанд. Хушбахтона,  кӯдакон ва наврасони 10 адад маҳфилҳои варзишии муассиса  дар замони истиқлолияти давлатӣ дар чемпионату мусобиқаҳои байналмилалии давлатҳои  Қатар, Эрон, Кореяи Ҷанубӣ, Чин, Росия, Беларус, Таиланд, Қазоқистон, Қирғизистон, Ӯзбекистон  ширкат  варзида, ҷойҳои намоёнро ишғол намуда, парчами ҷумҳуриамонро парафшон намуданд».