Дар Суғд озмуни ихтироъкорон ва навоварони ҷавон барпо мешавад

ДУШАНБЕ, 03.03.2017 /АМИТ «Ховар»/. Дар вилояти Суғд бахшида ба Соли ҷавонон озмуни ихтироъкорон ва навоварони ҷавон доир мегардад.
Тавре аз Маркази матбуоти Мақомоти иҷроияи маҳаллии ҳокимияти давлатии вилояти Суғд хабар доданд, озмуни мазкур аз моҳи март то ноябри соли равон дар самтҳои барномасозӣ ва низомҳои иттилоотӣ, дизайн ва меъморӣ, сохтмон, экология, геология, энергияи барқароршаванда, таҷҳизоти мошинсозӣ, маркшейдерия, металлургия, кӯҳкорӣ, техникаю технология ва илмҳои табиатшиносӣ баргузор мегардад.
Мутобиқи низомномаи озмун дар он наврасон ва ҷавонони то 30- сола ҳуқуқи иштирок карданро доранд. Ғолибони озмун пас аз анҷоми давраи ниҳоӣ муайян гардида, бо туҳфаҳои молӣ дар ҳаҷми аз 2 то 7 ҳазор сомонӣ кадрдонӣ мешаванд.