«Истиқлол» ба бозии Суперҷом тайёрӣ мебинад

ДУШАНБЕ, 02.03.2017/АМИТ «Ховар»/. Чемпиони Тоҷикистон- «Истиқлол»-и Душанбе ба бозии Суперҷоми мамлакат тайёриро пурзӯр менамояд. Футболбозони «Истиқлол» дар мавсими соли 2017 аллакай соҳиби Ҷоми Федератсияи футболи кишвар гаштанд. Мусобиқа барои Суперҷоми кишвар бо барандаи медалҳои нуқраи мавсими футболи соли 2016 -«Ҳосилот»-и Фархор аз бозиҳои муҳим дар мавсими футболи соли 2017 арзёбӣ мегардад. Бори аввал вохӯрӣ барои Суперҷом 4 март дар Варзишгоҳи 25 000-нафараи шаҳри Ҳисор гузаронида мешавад.
Тайёрии «Ҳосилот»-и Фархор ҳам ба ин вохӯрии муҳим аз ширкаташ дар силсилаи бозиҳои Ҷоми Конфедератсияи футболи Осиё (КФО) дарак медиҳад. Чор бозии расмии футболбозони Фархор бо «Шоҳин Асмоӣ»-и Афғонистон (1:0,1:1) ва «Дордой»-и Қирғизистон (0:1,1:1) таҷрибаи хубе хоҳанд буд барои ин бозӣ. Аз тарафи дигар «Дордой» ҳарифи навбатии «Истиқлол» дар бозиҳои гурӯҳии Ҷоми КФО ба шумор меравад ва мо дар қиёс ба бозии «Истиқлол» баҳо хоҳем дод.
Ёдрас мешавем, ки ин бозии ҳаштуми Суперҷоми Тоҷикистон ба ҳисоб меравад.