«Ҳамсафи мардони пурқувват» ва ё аввалин мусобиқаи духтарони боксчӣ

ДУШАНБЕ, 11.04.2017/АМИТ «Ховар»/. Дар тарабхонаи «Наврӯзгоҳ»-и шаҳри Душанбе 15 апрел аввалин мусобиқаи бокс миёни духтарон бахшида ба Соли ҷавонон гузаронида мешавад. Дар ин бора президенти бокси касбии Тоҷикистон Шӯҳрат Неъматуллоев ба АМИТ «Ховар» хабар дод.
Мусобиқа аз рӯи Лоиҳаи федератсияи бокси касбии мамлакат бо номи «Ғояи ташаккули бокси касбӣ миёни духтарон» таҳти шиори «Ҳамсафи мардони пурқувват» ҷараён мегирад. Он аз эълон шудани Соли ҷавонон аз ҷониби Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон маъво гирифта, бар зидди зӯроварӣ, нашъамандию нашъаҷаллобӣ ва нобаробарии гендерӣ равона гардидааст.
Дар мусобиқа духтарони боксчии мамлакат иштирок мекунанд.