Дар Қӯшунҳои сарҳадӣ ҷаласаи ҳисоботӣ баргузор гардид

ДУШАНБЕ, 13.04.2017 /АМИТ «Ховар»/. Дар давоми се моҳи аввали соли равон аз тарафи хизматчиёни ҳарбии қӯшунҳои сарҳадӣ дар якҷоягӣ бо кормандони КДАМ ва дигар мақомоти қудратӣ 340 кг маводи нашъаовар, 9 адад яроқи оташфишон ва 121 адад лавозимоти ҷангӣ аз қочоқчиён мусодира карда шудааст. Тавре аз маркази матбуоти Қӯшунҳои сарҳадии мамлакат Муҳаммад Улуғхоҷаев ба АМИТ «Ховар» иттилоъ дод, дирӯз дар толори Кохи «Шараф»-и Қӯшунҳои сарҳадии КДАМ Ҷумҳурии Тоҷикистон бо иштироки фармондеҳони Қӯшунҳои сарҳадӣ, муовинони фармондеҳ, сардорони раёсатҳо ва сардорони қисмҳои ҳарбии Қӯшунҳои сарҳадии КДАМ ҶТ ҷаласа оид ба натиҷаҳои фаъолияти хизматӣ-ҷангии ҷузъу томҳои Қӯшунҳои сарҳадӣ дар самти муҳофизати сарҳади давлатӣ, мубориза бар зидди қочоқи маводи нашъадор ва фаъолияти нуқтаҳои назорати гузаргоҳҳои сарҳадӣ баргузор гардид.
«Дар давоми се моҳ аз ҷониби ҷузъу томҳои Қӯшунҳои сарҳадӣ дар ҳамкорӣ бо мақомоти қудратӣ 15 амалиёт гузаронида шудааст. Бо қочоқчиёни маводи мухаддир 10 маротиба задухӯрдҳои мусаллаҳона сурат гирифта, 8 нафар қочоқчиёни афғон безарар ва 5 нафар дастгир карда шуданд», — иттилоъ дод М.Улуғхоҷаев ва илова кард, ки «дар ин муддат 32 далели вайронкунии сарҳади давлатӣ, 17 ҳодисаи вайронкунии низоми сарҳадӣ ба қайд гирифта шуда, 126 нафар вайронкунандагони сарҳади давлатӣ ва 73 нафар вайронкунандагони низоми сарҳадӣ боздошт шудаанд».
Дар маҷмӯъ дар давоми се моҳи соли равон тавассути нуқтаҳои гузаргоҳҳои сарҳадӣ 754 972 нафар шаҳрвандон гузар намуда, зиёда аз 31 ҳазор воситаҳои нақлиёт интиқол дода шудаанд. Дар баробари ҳамин, 85 нафар вайронкунандагони низом ва қоидаҳои будубош, инчунин 27 нафар шаҳрвандони дар кофтуковбуда дар гузаргоҳҳои сарҳадӣ дастгир шуда, ба мақомоти дахлдор супорида шуданд. Дар натиҷаи амалиёти фаврӣ хизматчиёни сарҳадӣ 8 нафар шаҳрвандонро, ки дар қочоқи маводи мухаддир даст доштанд, дастгир намуданд.
Аз тарафи фармондеҳи Қӯшунҳои сарҳадии КДАМ ба роҳбарияти Қӯшунҳои сарҳадӣ дар вилоятҳои Хатлон, Суғд, ВМКБ ва командирони қисмҳои ҳарбӣ оид ба иҷро намудани чорабиниҳои нақшавӣ, пешгирии ҳуқуқвайронкунӣ ва мустаҳкамии сарҳади давлатӣ супоришҳои мушаххас дода шуда, вазифаҳои хизматӣ дар нимсолаи дуюми соли равон муайян карда шуданд, — зикр кард М.Улуғхоҷаев.