Бозии мунтахаби ҷавонони Тоҷикистон бо Фаластин бо ҳисоби мусовӣ анҷом ёфт
![](https://khovar.tj/wp-content/uploads/2017/07/CHavonon-futbol.jpg)
ДУШАНБЕ, 20.07.2017 /АМИТ «Ховар»/. Шоми дирӯз дастаи мунтахаби футболи ҷавонони Тоҷикистон дар марҳилаи интихобии Чемпионати Осиё-2018 дар гурӯҳи «Е» бозии нахустинашро бо дастаи мунтахаби ҷавонони Фаластин бо ҳисоби мусовӣ 2:2 анҷом дод. Ин бозӣ дар шаҳри Хеврони Фаластин баргузор гардид.
Тавре ба хабарнигори АМИТ «Ховар» аз Кумитаи миллии олимпии кишвар хабар доданд, ҳисобро дар дақиқаи 18 соҳибони майдон кушоданд. Баъд аз 15 дақиқа ба футболбозони мо даст дод, ки голи ҷавобӣ зананд. Эҳсони Панҷшанбе аз ҷониби чапи майдон тӯбро ба ҷаримагоҳ партофт ва ҳимоятгар Фирдавс Чақалов бо сар онро вориди дарвозаи ҳариф кард. Дар дақиқаи 51 бозӣ фаластиниҳо тӯби кунҷӣ заданд, ки он ба воситаи Зоир Ҷӯрабоев вориди дарвозаи дастаи мунтахаби ҷавонони мо гардид. Дар дақиқаи 75 футболбозони ҷавони кишвари мо комбинатсияи хуб иҷро карданд ва ҳамлагар Амирҷон Сафаров бо дарвозабони Фаластин як ба як баромад, аммо дар ҷаримагоҳ аз по афтод. Довари майдон аз Уммон зарбаи ҷаримавии 11-метра таъйин кард ва баъд аз зарбаи капитани дастаи мунтахаби мо Нозим Бобоҷонов дарвозабон тӯбро аз вориди дарвозааш гирифт. Дар дақиқаҳои баъдӣ футболбозони мо чандин ҳолати хатарнокро дар нимаи майдони ҳариф эҷод карданд, аммо бенатиҷа. Бозӣ бо ҳисоби 2:2 ба поён расид.
Дар бозии дигари гурӯҳи «Е» бошад, дастаи мунтахаби футболи ҷавонони Урдун бар дастаи мунтахаби футболи ҷавонони Бангладеш бо ҳисоби калони 7:0 ғолиб омад.
Ёдовар мешавем,ки бозиҳои даври дуюм 21 июл баргузор мешаванд. Ҳарифи навбатии Тоҷикистон дастаи Бангладеш аст. Бозӣ соати 18:30 бо вақти Душанбе шурӯъ мегардад. Дар рақобати дигар Фаластин ва Урдун вомехӯранд.