Нашри нави «Бӯалӣ ва гиёҳдармонии амрози санги гурда»

Июль 4, 2017 16:45

ДУШАНБЕ, 04.07.2017 /АМИТ «Ховар»/. Панҷумин нашри китоби «Бӯалӣ ва гиёҳдармонии амрози санги гурда» дар таҳияи олимони шинохтаи тоҷик Саидҷон Нодирӣ ва Юсуф Нуралиев ба тозагӣ аз чоп баромад.

Китоб ин бор  бо тағйиру иловаҳо аз ҷониби Сарредаксияи илмии Энсиклопедияи миллии Тоҷикистон нашр шудааст.

Тавре дар оғоз муаллифон менависанд, рисола дар асоси таҷрибаи табиби бузург Абўалӣ ибни Сино иншо шудааст. Муаллифон 11 нусхаи мураккаб ва беш аз 100 нусхаи содаи Абўалӣ ибни Синоро, ки барои ҷилавгирӣ ва табобати бемориҳои амрози гурдаву санги масона пешбинӣ шудааст, шарҳ медиҳанд. Рисола ҳамчунин тавсияҳои Абўалӣ ибни Сино роҷеъ ба парҳез ва ҷилавгирӣ аз пайдоиши санги гурда ва дигар бемориҳои гурдаро дар бар мегирад.

Аз Китобхонаи миллии Тоҷикистон ба АМИТ «Ховар» хабар доданд, ки дар китоб тақрибан теъдоди 40 номгўй гиёҳҳои шифобахш аз хазинаи Абўалӣ ибни Сино аз мавқеи тибби муосир тавсиф гардида, нусхаҳои гиёҳдармонӣ барои табобати бемориҳои мухталиф оварда шудааст.

Муаллифон тамоми нусхаҳоро аз диди комёбиҳои гиёҳдармонии муосир тасҳеҳ кардаанд. Инчунин тарзи таҳия ва меъёри истеъмоли доруҳо сареҳан баён карда шудааст, то ки худи беморон дар шароити хона доруи заруриро омода карда,  истифода намоянд.

Ба андешаи муаллифон: «Асарҳои ҷовидона ва хусусан шоҳасари Ибни Сино «Ал-Қонун фи-т-тибб» аз қарни XII то имрўз ба забонҳои гуногуни дунё дар Аврупо, Шарқ ва олами ислом тарҷума ва ба теъдоди зиёд чоп шудаанд. Дар таърихи тамаддуни башарӣ камтар китобе ёфт мешавад, ки мисли «Ал-Қонун» дар муддати беш аз ҳазор сол ҳамаи аҳли оламро сарфи назар аз тафовути забону миллат, расму оин, дину мазҳаб, нажоду иқлим ва ғояву ҷаҳонбинӣ холисонаву яксон хизмат карда бошад».

Мутолиаи «Бӯалӣ ва гиёҳдармонии амрози санги гурда» на танҳо барои табибон, балки барои ҳамаи хонандагон аз манфиат холӣ нест.

Июль 4, 2017 16:45

Хабарҳои дигари ин бахш

Муовини Сарвазири Тоҷикистон бо вазъи соҳаи кишоварзии шаҳри Турсунзода шинос шуд
Дар Хатлон беш аз 2,8 ҳазор қонуншиканӣ дар соҳаи истифодаи нерӯи барқ ошкор шудааст
Филми «Дар талоши ҳақиқат» дар Синамоҷашнвораи байналмилаии давлатҳои аъзои СҲШ бо ҷойзаи махсус қадрдонӣ шуд
Дар Техас шумораи ҳалокшудагон бар асари обхезӣ ба 80 нафар расид
Дар Суғд ба масофаи 665 метр корҳои соҳилмустаҳакамкунӣ анҷом дода шуд
Имрӯз ҳаво дар шаҳри Душанбе то 41 дараҷа гарм мешавад
Дар Китобхонаи миллии Тоҷикистон бахшида ба Рӯзи маъюбон ҳамоиш доир шуд
«САМУРАЕ, КИ ШАМШЕР НАДОРАД». Асари нависандаи ҷопонӣ тарҷума ва нашр гардид
Имсол дар Тоҷикистон дар беш аз 186 ҳазор гектар кишти такрории зироати кишоварзӣ гузаронида мешавад
Кишоварзони ноҳияи Зафаробод дар беш аз 10 ҳазор гектар пунбадона кишт намуданд
Дар Тоҷикистон беш аз 11 ҳазор гектар шолӣ кишт шудааст
Дар «Ҳамсафар» 300 нафар хонандагон ба истироҳат ҷалб гардиданд