«Барқчӣ» дар бозии мавқуфи даври 16-уми Чемпионати Тоҷикистон оид ба футбол бар дастаи «Ҳосилот» пирӯз шуд

ДУШАНБЕ, 31.08.2017 /АМИТ «Ховар»/. Дар бозии мавқуфмондаи даври 16-уми Чемпионати Тоҷикистон миёни дастаҳои Лигаи олӣ дастаи  футболи «Барқчӣ»-и шаҳри Ҳисор дар майдони худ бо ҳисоби калони 5:1 бар дастаи  футболи «Ҳосилот»-и Фархор ғолиб омад.

Тавре аз Федератсияи футболи Тоҷикистон ба  АМИТ «Ховар» иттилоъ доданд, аз ҳайати дастаи ғолиб Шериддин Бобоев ва Тоҳир Малодустов ду голӣ ба  ҳадаф расониданд. Як тӯби дигарро Шаҳром Самиев вориди дарвозаи ҳарифон кард. Ягона голи меҳмононро Баҳром Изомов  ба нишон расонд.

Пас аз ин пирӯзӣ дастаи  футболи  «Барқчӣ» дар ҷадвали умумии мусобиқа имтиёзҳояшро бо дастаи футболи  «Регар-ТадАЗ»-и Турсунзода баробар намуда, мавқеи 4-умро ишғол кард.