Дастаи мунтахаби наврасони Тоҷикистон бо дастаҳои Россия ва Ӯзбекистон дар як гурӯҳ бозӣ мекунад

ДУШАНБЕ, 18.08.2017 /АМИТ «Ховар»/. Аз 3 то 9  сентябр дар шаҳри Алмаато мусобиқаи 10-уми анъанавии Ҷоми Президенти Қазоқистон миёни футболбозони 17- сола  бо шумули 8 даста дар 2 гурӯҳ баргузор мегардад. Тавре аз Федератсияи футболи Тоҷикистон ба  АМИТ «Ховар» иттилоъ доданд, наврасони мо дар як гурӯҳ бо Ӯзбекистон, Қирғизистон ва Россия барои баромадан ба даври нимфиналӣ талош хоҳанд кард. Ҳарчанд ин мусобиқа байни бозингарони  то 17- сола сурат мегирад, вале ба гуфти намояндаи ҳайати даста Анваршо Мирзоев, танҳо наврасони  16-солаи  мо шарафи Тоҷикистонро намояндагӣ мекунанд.

Бояд гуфт, ки қаблан дастаи ҷавонони мо 4 маротиба дар ин мусобиқаи байналмилалӣ ширкат карда, дар соли аввал мақоми сеюм ва соли гузашта зинаи дуюмро ишғол кард. Соли 2016 наврасони мо бозиҳоро дар марҳилаи гурӯҳӣ бо натиҷаи баланд ҷамъбаст карда, бар ҳарифони худ, чун Эрон, Россия ва Озарбойҷон дастболо шуданд.