ФУТБОЛ: «Вахш» дар доираи бозиҳои даври 17-уми Чемпионати Тоҷикистон бар дастаи «Регар-ТадАЗ» пирӯз шуд

ДУШАНБЕ, 21.08.2017 /АМИТ«Ховар»/. Дастаи «Вахш»-и  Қӯрғонтеппа дар бозии даври 17-ум  бар дастаи мизбон- «Регар-ТадАЗ»-и Турсунзода бо ҳисоби 2:0 ғолиб омад. Голҳоро дар ин вохӯрӣ Умарҷон Шарифов дар дақиқаи 35-ум ва Отабек Каримов дар дақиқаи 72-юм ба ҳадаф расонданд.

Тавре аз Федератсияи футболи Тоҷикистон ба  АМИТ «Ховар» иттилоъ доданд, баъди ин ғалаба дастаи футболи  «Вахш» дар ҷадвали мусобиқа ба зинаи панҷум баромад. Бозии дигар миёни дастаҳои «Панҷшер»-и Ҷалолиддини Балхӣ ва ССКА «Помир»-и Душанбе бо ҳисоби мусовӣ- 1:1 ба поён расид.

Дар ҳамин ҳол дастаи футболи «Истиқлол» дар ҷадвали умумии мусобиқот мавқеи худро боз ҳам устувор намуд.   Барои  маротибаи  6-ум дастёб шудан ба унвони  чемпиони Тоҷикистон   «Истиқлол»-ро зарур аст аз 6 бозии оянда танҳо 4 имтиёзи дигар ба даст орад. Дастаи  ССКА «Помир» бо 29 имтиёз дар мақоми дуюм ва «Хуҷанд» бо 27 имтиёз дар мақоми сеюм қарор доранд. Ҳарду даста барои медалҳои нуқраву биринҷӣ мубориза мебаранд.

Ёдовар мешавем, ки бозиҳои даври 18-уми мусобиқаи лигаи олӣ 23 август баргузор мешаванд. Дар ин давр дастаи «Вахш» бо  ССКА «Помир», «Барқчӣ» бо  «Панҷшер» ва «Регар-ТадАЗ» бо «Ҳосилот» бозӣ мекунанд.