«Истиқлол» (Душанбе) дар Тошканд се бозии санҷишӣ анҷом дод

ДУШАНБЕ, 01.08.2017 /АМИТ «Ховар»/. Дастаи футболи «Истиқлол»-и Душанбе- чемпиони  Тоҷикистон бо  дастаи лигаи олии Ӯзбекистон- «Металлург»-и Бекобод бозии санҷишӣ анҷом дод. Ин бозии охирини санҷишӣ  дар доираи ҷамъомади таълимиву тамринии «Истиқлол» дар Тошканд  дар варзишгоҳи «Дӯстлик»-и шаҳри Тошканд бо ҳисоби мусовии 1:1 хотима ёфт.
Тавре аз Федератсияи футболи Тоҷикистон ба  АМИТ «Ховар» иттилоъ доданд, ҳисобро дар дақиқаи 15-уми бозӣ Ислом Исҳоқҷонов, бозингари дастаи футболи  «Металлург»  кушод. Дар дақиқаи охирини дидор Дилшод Восиев, ки дар нимаи дуюм ба майдон баромад, ҳисобро баробар кард. Ҳамин тариқ, дастаи «Истиқлол» дар доираи ҷамъомади таълимиву тамринӣ дар Тошканд се бозии санҷишӣ  анҷом дод.
Дастаи «Истиқлол»   аз  дастаи футболи   «Нефтчӣ»-и Фарғона бо ҳисоби 1:2 шикаст хӯрда, ду бозиро бо дастаҳои футболи  «Машъал»-и Муборак ва «Металлург»-и Бекобод бо ҳисоби якхелаи 1:1 ба анҷом расонид.