Кони ангишти «Камароб» ба муассисаҳои буҷавии ноҳияи Рашт 1300 тонна ангишт дастрас намуд

РАШТ, 05.12.2017 /АМИТ «Ховар»/. Кони ангишти «Камароб»   дар баландии беш аз 3500 метр дар дараи Камароби ноҳияи Рашт воқеъ мебошад. Соли равон ҶДММ «Камароб» аз ин кон 37 ҳазору 900 тонна ангишт истихроҷ намуда, ба корхонаҳои саноатии ҷумҳурӣ ва хоҷагии халқи мамлакат пешниҳод намуд. Тибқи иттилои масъулини ҶДММ «Камароб»,  аз сабаби  дер омадани фасли зимистон онҳо имсол нисбат ба нақшаи пешниҳодгардидаи истихроҷи ангишт  2900 тонна зиёдтар ангишт истихроҷ намудаанд.

ҶДММ «Камароб»  дар асоси Қарори Ҳукумати Ҷумҳурии Тоҷикистон «Дар бораи сари вақт омода намудани соҳаҳои иқтисодиёт ва иҷтимоиёти ҷумҳурӣ  барои фаъолияти мунтазам ва самарабахш дар давраи тирамоҳу зимистони солҳои 2017-2018»  бо муассисаҳои буҷавии ноҳияи Рашт шартнома баста, тибқи талаботи ин муассисаҳо 1300 тонна ангишт  ворид намудааст.

Роҳбарияти ширкат дар асоси дастуру супоришҳои Ҳукумати Ҷумҳурии Тоҷикистон  ба маъюбони  ноҳияи Лахш 40 тонна,  маъюбони ноҳияи Тоҷикобод  25 тонна, ба хона-интернати шаҳри Ҳисор 32 тонна, ба ниёзмандону ятимон ва маъюбони ноҳияи Рашт 120 тонна ва ба кормандони мақомоти ҳифзи ҳуқуқи ноҳияи Рашт 40 тонна ангишт  ройгон кумак расониданд.