Фестивали «Футбол ба назди шумо меояд — 2018» дар Бадахшон

ДУШАНБЕ, 26.04.2018 /АМИТ «Ховар»/. 25 апрел дар варзишгоҳи деҳаи Дерӯшони ноҳияи Рӯшони Вилояти Мухтори Кӯҳистони Бадахшон бо ташаббуси Федератсияи футболи Тоҷикистон ва Лигаи футболи кӯдакону наврасон Фестивали «Футбол ба назди шумо меояд — 2018»  баргузор гардид.

Тавре хабарнигори рӯзномаи «Пайғоми Рӯшон» Мамадалӣ Бахтиёров ба АМИТ «Ховар» хабар дод, дар ҳавои гимни FIFA фестивал оғоз ёфта, дар он 11 тими футболбозони навраси аз 6-сола то 12-сола машқҳои варзишӣ намоиш доданд.

Раҷабов Шамсиддин, намояндаи Лигаи футболи кӯдакону наврасони Тоҷикистон дар суҳбат изҳор дошт, ки Фестивали «Футбол ба назди шумо меояд» чор сол боз дар шаҳри Душанбе гузаронида мешавад ва имсол Федератсияи футболи Тоҷикистон тасмим гирифт, ки фестивалро дар дигар вилоятҳои ҷумҳурӣ гузаронад. Мақсади фестивал ташкилу дастгирии футболи лигаи ҳавлигӣ (дворная лига) ва ташвиқи футбол дар саросари мамлакат мебошад. Барои ин тимҳои махсус лозим нест, балки он наврасоне, ки дар кӯчаҳо ва ҳавлиҳо ба футболбозӣ машғуланд, шавқманд карда мешаванд.

Даври ниҳоии фестивал моҳи июн дар шахри Хоруғ баргузор мешавад, ки дар он аз ҳар ноҳия чор тим —  тими кӯдакони 6-7-сола, тими кӯдакони 8-9-сола, тими наврасони 10-11-сола ва тими наврасони 12-сола ширкат хоҳанд кард.

Мутахассиси Федератсияи футболи Тоҷикистон Владимир Домуллоҷонов, ки кӯдаконро ба фестивал тайёр мекард, иброз дошт, ки фестивали «Футбол ба назди шумо меояд -2018»  аз моҳи январ ин ҷониб идома ёфта, дар шаҳрҳои  Хуҷанд, Кӯлоб ва Бохтар гузаронида шуд. Моҳи апрел фестивали мазкур дар водии Рашт ва Бадахшон гузаронида шуда истодааст.

«Фестивал шавқи кӯдакону наврасонро ба бозии футбол зиёд мекунад ва мо инро ҳангоми сафар ба навоҳии кишвар баръало ҳис мекунем», — гуфт Владимир Домуллоҷонов.

Дар фарҷоми фестивал ба футболбозони навраси ноҳияи Рӯшон 20 тӯби футбол ва се дарвоза тақдим карда шуд. Пас аз барномаи расмии фестивал байни наврасон бозии футбол ташкил гардид.