Муштзанони ҷавони тоҷик дар Бангкок соҳиби 2 медал шуданд

ДУШАНБЕ, 28.04.2018 /АМИТ «Ховар»/. Тими ҷавонони кишвар оид ба бокс дар Чемпионати Осиё-2018 дар шаҳри Бангкоки Тайланд сазовори ду медал гардид.

Тавре ба АМИТ «Ховар» аз Кумитаи миллии олмпии Тоҷикистон хабар доданд, рақобатҳо аз рӯи 10 вазн миёни писарон ва 10 вазн миёни духтарон аз 21 то 27 апрел сурат гирифтанд. Варзишгарбонуи тоҷик Идимоҳ Холова дар вазни 64 кило миёни духтарон сазовори медали нуқра ва Муҳаммадалӣ Абдураҳмонов дар вазни 75 кило миёни писарон сазовори медали биринҷӣ шуданд.

Ҳамчунин дар доираи Чемпионати Осиё миёни ҷавонон оид ба бокс дар Бангкок тими Тоҷикистон аз Конфедератсияи бокси Осиё таҷҳизоти варзишӣ дарёфт намуд. Аз чунин кумаки моддӣ дар доираи чемпионату мусобиқаҳо оид ба бокс соли 2017 14 давлат бархӯрдор шуда буданд. Ин кумак имсол низ ба дигар кишварҳо дастрас мегардад.