САФАР КОМИЛОВ, САМБОЧИИ НАВРАСИ ТОҶИК — ҒОЛИБИ ҶОМИ «САКСОНИЯ»! Дар Берлин ӯро сафири Тоҷикистон ба ҳузур пазируфт

ДУШАНБЕ, 03.04.2018./АМИТ «Ховар»/.  Дирӯз Сафири Тоҷикистон дар Ҷумҳурии Федеративии Германия (ҶФГ)  Маликшо Неъматов варзишгари навраси тоҷик, ғолиби Мусобиқаи байналмилалӣ барои дарёфти  ҷоми «Саксония» –ро оид ба самбо Сафар Комиловро ба ҳузур пазируфт. Дар ин бора ба АМИТ «Ховар» аз Сафорати ҶТ дар ҶФГ хабар доданд.

Сафар Комилов  31 марти соли 2018 дар ин мусобиқаи байналмилалӣ, ки дар он беш аз 200 нафар варзишгарони наврас  аз   Германия, Россия, Чехия ва Словакия иштирок намуданд, бар панҷ ҳарифи худ дастболо шуда, медали тилло ва ҷоми мусобиқаро ба даст овард.

Сафар Комилов фарзанди мушовири Сафорати Тоҷикистон дар  Германия Мурод Саидзода буда, 13 сол дорад.

Ду сол пеш зимни  як мусобиқи дигари байналмилалӣ барои Ҷоми Аврупо оид ба дзюдо дар шаҳри Берлин Сафар якҷо бо кормандони Сафорат ба мухлисии паҳлавони маъруфи кишварамон Хуршед Маҷидов ба қасри варзишии Берлин омада буд.  Дар ин мусобиқаи  бонуфуз Хуршед медали нуқраи  мусобиқаро  соҳиб шуд. Ин комёбии ҳамватани мо   дар қалби  Сафари наврас меҳри гӯштинро ҷой кард.

Ба илтиҷо ва хоҳиши баланди Сафар тоб наоварда, падараш ӯро ба клуби самбои «SAMBO COMBAT GRYPHON» -и шаҳри Берлин бурд. Сафар Комилов тӯли се соли машқу тамринаш дар риштаи самбо зери назари устоди варзиш Андрей Герцен алакай на танҳо дар мусобиқаҳои гуногуни умумиолмонӣ,  балки аврупоӣ иштирок карда, 30 медал —  10 тилло, 6 нуқра ва 1 биринҷӣ ба даст овардааст!

Айни замон Сафар дар вазни худ дар кулби варзишии самбои Берлин ғолиби мутлақ мебошад. Ӯ ҳамаи чемпионатҳои ҷаҳон ва мусобиқаҳои байналмилалиеро, ки дар онҳо варзишгарони тоҷик иштирок мекунанд, тамошо мекунад. Сафар  аз натиҷаҳои варзишии устоди шодравон,  чемпиони ҷаҳон оид ба сакмбо  Саидмуъмин Раҳимов,  паҳлавонони  номдори тоҷик Расул Боқиев, Беҳрӯзи Хоҷазода, Комроншоҳ Устопириён, Хуршед Маҷидов ва дигарон огоҳ аст ва дар бораи онҳо бо ифтихор ба дӯстони олмониаш   қисса  мекунад.

Сафири Тоҷикистон варзишгари навраси тоҷик Сафар Комиловро бо натиҷаҳои баланди варзишиаш табрик гуфта, барояш иқболи баланд  таманно кард ва ҳамзамон ба ӯ парчами Ҷумҳурии Тоҷикистонро тӯҳфа намуд. Сафар Комилов дар ҷавоб чунин иброз дошт: «Ҳар ҷое, ки ғалаба мекунам ҳамагон аз миллату кишварам мепурсанд ва боифтихор парчами Тоҷикистонро ҳамеша бо худ мегирам ва болои сарам парафшон мекунам…».