ТАЪМИНИ АҲОЛӢ БО ШУҒЛИ ПУРМАҲСУЛ – ЯКЕ АЗ ҲАДАФҲОИ СТРАТЕГИИ ҲУКУМАТИ ТОҶИКИСТОН. Дар Маркази тадқиқоти стратегӣ роҷеъ ба ин мавзӯъ суҳбати гирди мизи мудаввар доир гардид

Май 1, 2018 12:00

ДУШАНБЕ, 01.05.2018 /АМИТ «Ховар»/. «Аҳолии синни қобили меҳнати Ҷумҳурии Тоҷикистон то соли 2030 аз 5,6 миллион нафари ҳозира ба 6,9 миллион нафар мерасад», — чунин зикр шуд дар суҳбати гирди мизи мудаввар, ки дар шаҳри Душанбе бо ибтикори Маркази тадқиқоти стратегии назди Президенти  Ҷумҳурии Тоҷикистон дар мавзӯи «Таъмини шуғли пурмаҳсул дар Ҷумҳурии Тоҷикистон» доир гардид.

Хабарнигори АМИТ  «Ховар» иттилоъ медиҳад, ки дар нишаст директори Маркази тадқиқоти стратегии назди Президенти Ҷумҳурии Тоҷикистон  Худобердӣ Холиқназар роҷеъ ба сиёсати пешгирифтаи иҷтимоии Ҳукумати Ҷумҳурии Тоҷикистон дар самти таъмини аҳолӣ бо шуғли пурмаҳсул сухан кард. Таъкид шуд, ки Ҷумҳурии Тоҷикистон кишвари иҷтимоӣ буда, таъмини аҳолӣ бо ҷойи кору шуғли пурмаҳсул ва дар заминаи он фароҳам овардани  зиндагии шоиста ба аҳолӣ дар маркази таваҷҷуҳи Ҳукумати Ҷумҳурии Тоҷикистон қарор дорад.

Мавриди зикр аст, ки масъалаи таъмини шуғли пурмаҳсул яке аз масъалаҳои муҳиму калидӣ буда, бори аввал дар «Стратегияи миллии рушди Ҷумҳурии Тоҷикистон барои давраи то соли 2030» ворид карда шудааст. Инчунин дар мамлакат Стратегияи рушди бозори меҳнат то соли 2020 қабул гардидааст. Зикр гардид, ки  бо бунёди иншооти бузурги гидроэнергетикӣ, аз ҷумла НБО «Роғун» дар мамлакат корхонаҳои азими саноатӣ ва истихроҷу коркарди маъданҳои куҳӣ бунёд ва ба кор дароварда хоҳанд шуд, ки саҳми онҳо дар фароҳам овардани ҷойҳони нави корӣ ва таъмини аҳолии мамлакат бо  шуғли пурмаҳсул ва мушарраф гардидани аҳолии мамлакат ба зиндагии шоиста муҳим ҳоҳад буд.

Дар суҳбати мизи мудаввар ҳамчунин гуфта шуд,  интизор меравад, ки бо татбиқи «Стратегияи миллии рушди Ҷумҳурии Тоҷикистон барои то давраи соли 2030» Тоҷикистон дар масъалаи таъмини аҳолӣ бо ҷойи кор дар байни  кишварҳои ҷаҳон ҷойи 60–умро касб намояд, ки ин тамоюл муваффақияти бузург хоҳад буд. Тибқи таҳлилҳо, то соли 2030 аҳолии кишварамон ба 11,5 миллион нафар  расида, аҳолии қобили меҳнати ҷумҳурӣ аз 44,2 % ҳозира дар соли 2030 то ба 70 %  афзоиш меёбад.

Дар ҳамоиш  олимону коршиносон атрофи паҳлуҳои рушди бозори меҳнат бо назардошти истифодаи самараноки иқтидорҳои дохилии кишвар, низоми бозомӯзии кадрҳо ва омода намудани мутахассисони ҳирфаии ба рақобат тобовар дар бозори меҳнат, ислоҳот дар низоми шуғли пурмаҳсул, ҳавасмандгардонии шуғли пурмаҳсул, баланд  бардоштани ҳиссаи шуғли расмӣ дар  иқтисодиёти кишвар ва дигар масъалаҳои марбут ба фароҳам овардани ҷойҳои нави корӣ дар соҳаҳои гуногуни иқтисодиёти мамлакат табодули назар намуда, пешниҳодҳои самарабахш ироа карданд.

Май 1, 2018 12:00

Хабарҳои дигари ин бахш

Ҷарроҳони чинӣ наврасонеро, ки бемории нуқсони модарзодии дил доранд, ройгон ташхис менамоянд
НИШАСТИ МАТБУОТӢ. Дар Тоҷикистон ҳолатҳои бекоршавии ақди никоҳ кам шудаанд
Ҳайати ҷавонони Тоҷикистон дар ҷаласаи Шурои ҷавонони Созмони ҳамкории Шанхай иштирок намуд
НИШАСТИ МАТБУОТӢ. Корхонаи «Тоҷиксуғурта» ба 588 оилаи аз офати табиӣ зарардидаи минтақаи Рашт кумаки молиявӣ расонид
Беш аз 5 ҳазор нафар дар муассисаҳои таҳсилоти ибтидоии касбӣ машғулияти касбомӯзиро хатм намуданд
ҲУКУМАТИ ЭЛЕКРОНӢ. Вазорати меҳнат, муҳоҷират ва шуғли аҳолӣ ба самти инноватсионии рақамӣ мегузарад
НИШАСТИ МАТБУОТӢ. Муҳлати таҳсил дар коллеҷҳо кам карда шуд
НИШАСТИ МАТБУОТӢ. Дар Тоҷикистон беш аз 23 ҳазор ҷойи кор таъсис дода шудааст
НИШАСТИ МАТБУОТӢ. Дар 56 корхонаи тобеи Кумитаи хоҷагии манзилию коммуналӣ системаи биллингӣ амал менамояд
НИШАСТИ МАТБУОТӢ. Дар Тоҷикистон риоя нашудани қонуни танзим 255 ҳолат камтар сабт гардидааст
Дар Душанбе ҳамоиши ҳизбиён бахшида ба қабули қатъномаи таърихии Тоҷикистон оид ба зеҳни сунъӣ баргузор шуд
Маркази миллии қонунгузорӣ 41 санади меъёрӣ-ҳуқуқиро аз экспертиза гузаронид