Юрий Бондар, Вазири фарҳанги Беларус: «Баргузории Рӯзҳои фарҳанги Беларус дар Тоҷикистон риштаҳои дӯстиро мустаҳкамтар мегардонад»

ДУШАНБЕ, 16.05.2018. /АМИТ «Ховар»/. Имрӯз дар Китобхонаи миллии Тоҷикистон дар доираи Рӯзҳои фарҳанги Ҷумҳурии Беларус дар Ҷумҳурии Тоҷикистон нишасти матбуотӣ бо иштироки доираи васеи рӯзноманигорон баргузор гардид.

Тавре хабарнигори АМИТ «Ховар» иттилоъ медиҳад, дар оғози нишаст Вазири фарҳанги Ҷумҳурии Тоҷикистон Шамсиддин Орумбекзода  меҳмононро бо ин падидаи гуворои фарҳангӣ шодбош намуд.

Дар навбати худ Вазири фарҳанги Ҷумҳурии Беларус Юрий Бондар иброз дошт, ки минбаъд ҳамкорӣ бояд дар соҳаҳои гуногуни фарҳанг, аз ҷумла дар соҳаи санъати кино таҳким ёбад. Юрий Бондар зикр намуд, ки воқеан фарҳанг пайвандагари халқҳо мебошад. «Боварии комил дорем, ки баргузории Рӯзҳои фарҳанги Беларус барои боз ҳам мустаҳкамтар намудани риштаҳои дӯстии ду кишвар ва муаррифии санъату фарҳанги ҳарду давлат ҳиссаи арзанда мегузорад», — изҳори итминон намуд Ю. Бондар.

Дар идома Вазири фарҳанги Ҷумҳурии Беларус афзуд, ки ин Рӯзҳо маҳз ба шарофати сиёсати фарҳангпарваронаи Президенти Ҷумҳурии Тоҷикистон Эмомалӣ Раҳмон ва Президенти Беларус Александр Лукашенко, инчунин бо кӯшишҳои вазоратҳои фарҳанги ҳарду давлат баргузор гардиданд.

Зимни нишаст Директори генералии «Киностудияи миллии Беларусфилм» Михаил Карачевский ба мардуми тоҷик барои пазироии гарму самимӣ ва меҳмоннавозӣ изҳори сипос намуда, дар бораи мавҷудияти созишнома оид ба муносибатҳои фарҳангии ду кишвар маълумот дод. Изҳори умед карда шуд, ки минбаъд ҳамкорӣ дар соҳаҳои гуногуни фарҳанг, аз ҷумла дар соҳаи санъати кино таҳким меёбад.

Дар ҷараёни нишаст ҳамчунин вазирони фарҳанги ҳарду давлат ба саволҳои хабарнигорон посухҳои мушаххас доданд.