ФУТБОЛ: дастаи мунтахаби ҷавонони Тоҷикистон ба финали Ҷоми шаҳрдории Остона роҳ ёфт

ДУШАНБЕ, 13.07.2018 /АМИТ «Ховар»/. Дастаи мунтахаби ҷавонони то 16-солаи  Тоҷикистон   таҳти роҳбарии сармураббӣ Зайниддин Раҳимов ба бозии ниҳоии Мусобиқаи байналмилалии Ҷоми шаҳрдории Остона роҳ ёфт.

Тавре аз Федератсияи футболи Тоҷикистон ба хабарнигори АМИТ «Ховар» иттилоъ доданд, дар бозии охири марҳилаи гурӯҳӣ  дастаи мунтахаби то  16-солаи Тоҷикистон  бо дастаи мунтахаби  то 17- солаи   «Остона»  рақобат намуд. Дар ин сабқати ҷолибу диданӣ   дастаи мунтахаби  Тоҷикистон бо ҳисоби 3:1 дастболо шуда, роҳхати даври ниҳоии мусобиқаи мазкурро соҳиб шуд.

Ёдовар мешавем, ки имрӯз, 13 июл дар финал дастаи  мунтахаби  Тоҷикистон бо дастаи мунтахаби  «Шахтёр U-17» (Қарағанда, Қазоқистон) рақобат мекунад. Вохӯрии мазкур дар Варзишгоҳи  «Астана-Арена», соати 16:30 ба вақти Душанбе баргузор мешавад.