Таҷлили 27-умин солгарди Истиқлолияти давлатии Ҷумҳурии Тоҷикистон дар Сафорати Тоҷикистон дарТеҳрон

ДУШАНБЕ, 07.09.2018 /АМИТ «Ховар»/. Дар Сафорати Ҷумҳурии Тоҷикистон дар Теҳрон ба ифтихори 27-умин солгарди Истиқлолияти давлатии Тоҷикистон бо ҳузури ҳамватанони муқими кишвари будубош, аз ҷумла, донишҷӯёни тоҷикистонӣ  ҷамъомад баргузор гардид.

Аз Вазорати корҳои хориҷии Ҷумҳурии Тоҷикистон ба АМИТ «Ховар» иттилоъ доданд, ки ҷамъомадро Сафири Ҷумҳурии Тоҷикистон дар Ҷумҳурии Исломии Эрон Неъматулло Эмомзода оғоз бахшида, ҳозиринро бо ин ҷашни фархунда табрик намуд.

Дипломати тоҷик дар бораи ин рӯйдоди бузург ва аҳамияти он дар сарнавишти мардуми тоҷик, дастовардҳои даврони соҳибихтиёрӣ бо роҳбарии Асосгузори сулҳу ваҳдати миллӣ — Пешвои миллат, Президенти Ҷумҳурии Тоҷикистон муҳтарам Эмомалӣ Раҳмон, барномаву ҳадафҳои муҳим ва ташаббусҳои байналмилалии роҳбарияти мамлакат  сухан кард.

Дар ҷамъомади ҷашнӣ наворҳои видеоӣ ва суруду оҳангҳои миллӣ пахш гардида, барои меҳмонон ғизоҳои миллӣ манзур карда шуданд.