«АНДАЛЕБ — 2018». Комёбиҳои фарҳангу ҳунари минтақаҳои кишвар бо тобишҳои рангин манзури тамошобинон мегарданд

ДУШАНБЕ, 9.10.2018. /АМИТ «Ховар»/. Ба ифтихори Соли рушди сайёҳӣ ва ҳунарҳои мардумӣ ва  27-солагии Истиқлолияти давлатии Ҷумҳурии Тоҷикистон дар шаҳру навоҳии мамлакат Фестивал – озмуни ҷумҳуриявии телевизионии эҷодиёти халқ «Андалеб — 2018» гузаронида мешавад.

Тавре аз маркази матбуоти Вазорати фарҳанги Ҷумҳурии Тоҷикистон ба АМИТ «Ховар» хабар доданд, даври аввали фестивал 12 октябри соли равон дар ноҳияи Темурмалик доир мегардад. 15 октябр дастаҳои ҳунарии ноҳияҳои Ховалинг ва Гулистон санъат ва маҳорати худро манзури тамошобинон ва ҳайати ҳакамони озмун мегардонанд.

Даври аввали Фестивал-озмун дар шаҳру навоҳии мамлакат то 17 ноябри соли равон идома хоҳад ёфт.

Нимаи дуюми моҳи ноябр даври дуюми Фестивал – озмун дар маркази вилоятҳо ва даври ҷамъбастӣ 24 ноябри соли ҷорӣ дар Рӯзи ҷашни Парчами Ҷумҳурии Тоҷикистон дар шаҳри Душанбе сурат мегирад.

Мақсад аз баргузории фестивал — озмун намоиш додани дастовардҳои ҳунарию фарҳангии даврони соҳибистиқлолии кишвар ва ҳунарҳои мардумӣ буда, аҳли фарҳанги ҷумҳурӣ тавассути Фестивал — озмун комёбиҳои фарҳангу ҳунари ҳар як минтақаи кишварро бо тобишҳои рангини он манзури тамошобинон мегардонанд.

Фестивал озмун аз 14 шарт, яъне намоиши ҳунарҳои мардумӣ «Бозори ҳунар», суруди ҳамсароёни бисёровоза (хор), намоиши либосҳои миллӣ, навозиши умумӣ, хониши бадеӣ, рақс, суруд ва навозиши якка, бадеҳа ё лапар, суруди анъанавӣ ва ҳаҷвӣ, порча аз анъанаҳои мардумӣ, суруд ва ё рақси халқҳои сокини Тоҷикистон ва сюитаи овозию рақсӣ иборат мебошад.