Бозиҳои даври 20-уми Чемпионати Тоҷикистон ба таъхир гузошта шуданд

ДУШАНБЕ, 16.10.2018 /АМИТ «Ховар»/.  Лигаи футболи Тоҷикистон бо қарори худ бозиҳои даври 20-уми Чемпионати Тоҷикистонро ба вақти номуайян ба таъхир гузошт. Тавре сомонаи расмии ФФТ хабар медиҳад, иштироки дастаи мунтахаби мамлакат дар мусобиқаи байналмилалии «Bangabandhu Gold Cup» дар Бангладеш  ба ин амал сабаб гардид.

Бозиҳои даври 20-ум бо ширкати дастаҳои «Истиқлол» – КМВА «Помир», «Хатлон» – «Хуҷанд», «Кӯктош» – «Регар-ТадАЗ»  ва «Панҷшер» – «Барқчӣ» аз рӯи тақвими мусобиқа  мебоист 21 октябр баргузор мегардиданд. Вале тибқи қарори Лигаи футболи Тоҷикистон, дар ин рӯз гузаронидани бозиҳои ½-ниҳоии Ҷоми Тоҷикистон муқаррар шудааст.

Ёдовар бояд шуд, ки 17 октябр бозиҳои рафти ½-ниҳоии Ҷоми Тоҷикистон миёни дастаҳои  «Истиқлол» бо  «Душанбе-83» ва «Регар-ТадАЗ» бо  «Хуҷанд», инчунин бозиҳои баргашти ин вохӯриҳо 21 октябр миёни «Душанбе-83» – «Истиқлол» ва «Хуҷанд» – «Регар-ТадАЗ» гузаронида мешаванд.