ФУТБОЛБОЗОНАМОНРО ЯКҶОЯ МУХЛИСӢ МЕКУНЕМ! Федератсияи футболи Тоҷикистон тамошои бозии финалии мунтахаби наврасони Тоҷикистон ва Японияро дар экрани калон ташкил менамояд

ДУШАНБЕ, 06.10.2018 /АМИТ «Ховар»/. Федератсияи футболи Тоҷикистон тамошои бозии финалии чемпионати Осиё-2018 миёни дастаҳои мунтахаби наврасони Тоҷикистон ва Японияро барои мухлисон ба таври ройгон ташкил мекунад.

Бозии мазкур 7 октябр дар Варзишгоҳи миллии Букит Ҷалили пойтахти Малайзия — шаҳри Куала-Лумпур доир мегардад. Ин бозӣ соати 20:45 ба вақти маҳаллӣ (соати 17:45 ба вақти Душанбе) оғоз мегардад.

Тавре аз Федератсияи футболи Тоҷикистон ба АМИТ «Ховар» хабар доданд, ҷараёни бозии футбол тавассути экрани калон дар Майдони «800-солагии Москва» – назди Театри давлатии академии опера ва балети ба номи С. Айнӣ мустақиман пахш карда мешавад. Марҳамат ба тамошои футбол!

Федератсияи футболи Тоҷикистон ҳамаи мухлисонро барои дастгирии мунтахаби наврасони кишвар даъват менамояд.

P.S. Ба мунтахаби наврасони кишвар дар чемпионати Осиё бурд таманно дорем!

Мусобиқаи Осиё-2018 миёни наврасон (U-16). Финал

7 октябр (якшанбе)

Оғоз – соати 17:45 ба вақти Душанбе

Япония – Тоҷикистон

Куала-Лумпур, Варзишгоҳи миллии Букит Ҷалил.