Варзишгарони шинохтаи тоҷик ба Амороти Муттаҳидаи Араб сафар карданд

ДУШАНБЕ, 26.10.2018 /АМИТ «Ховар»/. Дастаи мунтахаби Тоҷикистон оид ба дзюдо дар ҳайати 7 нафар ҷиҳати иштирок дар мусобиқаи байналмилалии дзюдо аз силсилаи «Grand Slam» ба Амороти Муттаҳидаи Араб сафар кард.

Тавре аз  Федератсияи  дзюдои  Тоҷикистон ба хабарнигори АМИТ «Ховар» хабар доданд, мусобиқаи байналмилалии дзюдои «Abu Dhabi Grand Slam 2018» 27-29 октябр баргузор мешавад.

Дар мусобиқа 372 нафар варзишгарон (230 мард, 142 зан) аз 64 кишвари дунё иштирок менамоянд. Ҷумҳурии Тоҷикистонро дар ин мусобиқаи бонуфуз 6 варзишгар бо роҳбарии сармураббии дастаи мунтахаби Тоҷикистон оид ба дзюдо Муҳаммадмурод Абдураҳмонов намояндагӣ мекунанд:

Мирзоҷамил Рамазонов (-73кг);
Раҳматуллобек Фарҳодов (-73кг);
Ҷаҳонгир Маҷидов (-81кг);
Комроншоҳ Устопириён (-90кг);
Саидҷалол Саидов (-100кг);
Хуршед Маҷидов (+100кг).

Дар асоси низомномаи мусобиқа, варзишгарон барои медали тилло 5000 доллари ИМА, барои медали нуқра 3000 доллари ИМА ва барои медалҳои биринҷӣ 1500-долларӣ ҷоиза мегиранд.

Ҳамчунин дар ин мусобиқа варзишгарон соҳиби холҳои олимпӣ мегарданд.