Зиёвуддин Фузайлов: «Ба ҳама барои дастгирӣ ташаккур мегӯям»

ДУШАНБЕ, 25.10.2018 /АМИТ «Ховар»/. Муҳофизатгари дастаи мунтахаби ҷавонони Тоҷикистон Зиёвуддин Фузайлов, ки  дар вохӯрии байни дастаҳои мунтахаби Тоҷикистон ва Малайзия (2:2) дар Чемпионати Осиё лат бардошта, майдонро тарк кард, барои дастгирӣ ва дилсӯзӣ ба ҳамагон изҳори ташаккур намуд.

«Ба ҳама барои дастгирӣ ташаккур мегӯям. Минатдории худро ба ҳайати даста ва мураббиён, дӯстон, мухлисон ва аҳли оила, ки дар ин лаҳзаҳои душвор маро таскин медоданд ва бо ман буданд, изҳор мекунам. Хушбахтона, ин ҷароҳат он қадар хатарнок нест ва он бе шикастану ҷарроҳӣ паси сар шуд. Аз рӯи гуфти духтурон, барои табобат якуним-ду моҳ зарур меояд. Дигар ҳама чиз аз ман вобастагӣ дорад. Кӯшиш мекунам, ки зуд сиҳат ёфта, ба майдони футбол баргардам

Ман аз футболбози дастаи мунтахаби Малайзия наранҷидаам. Ӯ аллакай аз ман узр пурсид. Боварӣ дорам, ки ӯ қасдан ин корро накардааст. Ин бозии футбол аст. Лат хӯрдану ҷароҳат бардоштан ҷузъи ин бозӣ ба ҳисоб мераванд. Албатта, баъди ин ҳодиса хеле тарсидам, ки поям шикастааст. Хушбахтона, ин тавр нашудааст ва он хатарнок нест».