Дар Душанбе фаъолияти солонаи Барномаи мусоидат ба идоракунии сарҳадот дар Осиёи Марказӣ (БОМКА) натиҷагирӣ карда шуд

ДУШАНБЕ, 28.11.2018 /АМИТ «Ховар»/. Имрӯз дар шаҳри Душанбе ҷаласаи чоруми минтақавии гурӯҳи ҳамоҳангсози Барномаи мусоидат ба идоракунии сарҳадот дар Осиёи Марказӣ (БОМКА, марҳалаи 9) баргузор гардид. Дар ин бора хабарнигори АМИТ «Ховар» аз макони ҳамоиш иттилоъ дод.

Дар ҷаласаи мазкур, ки ҳамасола гузаронида мешавад, намояндагони кумитаи сарҳадбонон, хадамоти гумрукӣ, вазорати корҳои хориҷӣ, Консорсиуми БОМКА, Дафтари намояндагии Иттиҳоди Аврупо дар ҷумҳуриҳои Тоҷикистон ва Қирғизистон иштирок намуданд.

Зимни мулоқот ҷонибҳо дар якҷоягӣ натиҷаҳои бадастовардаи Барномаро баҳогузорӣ намуда, муваффақият ва мушкилиҳоро мавриди муҳокима қарор доданд. Ҷиҳати идома додани Барномаи БОМКА то охири соли 2019, ба эътибор гирифтани афзалиятҳои минтақавӣ ва манфиатҳои миллӣ дар самти идоракунии сарҳадот фикру мулоҳизаҳо шунида шуда, нақшаи фаъолият қабул карда шуд.

Шурӯъ аз соли 2003, Барномаи БОМКА (мусоидат ба идоракунии сарҳадот дар Осиёи Марказӣ) яке аз  муҳимтарин иқдоми ҳамкории Иттиҳоди Аврупо бо кишварҳои Осиёи Марказӣ дар соҳаи идораи сарҳадот ва ҳамкории байнисарҳадӣ дониста мешавад. Марҳалаи 9-и Барномаи мусоидат ба идоракунии сарҳадот дар Осиёи Марказӣ (БОМКА) дар заминаи натиҷаҳо ва муваффақиятҳои марҳалаҳои қаблӣ таҳия шуда, ҳадафи он барои рушди институтсионалӣ, идоракунии гурӯҳҳои мухталифи муҳоҷирон ва мусоидат ба савдои байнисарҳадӣ нигаронида шудааст.

Аз соли 2015 наздик ба 2600 масъулони мақомоти давлатӣ аз 5 кишвари Осиёи Марказӣ барои иштирок дар 181 ҳамоиши гуногун: семинарҳои маҳаллӣ ва минтақавӣ, тренингҳо ва сафарҳои омӯзишӣ ба кишварҳои аъзои Иттиҳоди Аврупо сафарбар шуданд. То ба анҷом расидани лоиҳаи мазкур, дар доираи Барномаи БОМКА (марҳалаи 9) боз гузаронидани 24 барномаи дигар ба нақша гирифта шудааст.

Давоми солҳои 2003-2019 Иттиҳоди Аврупо барои татбиқи Барномаи БОМКА дар ҳаҷми 40,1 миллион евро маблағ ҷудо кардааст, ки аз ин маблағ 6,6 миллион евро ба татбиқи марҳалаи 9-и Барнома (солҳои 2015-2019) рост меояд.

Қобили зикр аст, ки моҳи декабри соли 2015  Пешвои муаззами миллат, Ҷаноби Олӣ муҳтарам Эмомалӣ Раҳмон зимни сафар ба Ҷумҳурии Франсия ва Шоҳигарии Белгия бо Намояндаи Олии Иттиҳоди Аврупо оид ба корҳои хориҷӣ ва сиёсати амниятӣ Федерика Могерини, Президенти Шӯрои Иттиҳоди Аврупо Доналд Туск ва Президенти Комиссияи Аврупо Жан Клод Юнкер мулоқот намуда, масъалаи рушди муносиботи ҳамкории Тоҷикистону Иттиҳоди Аврупоро баррасӣ намуда буданд.

«Тоҷикистон ба рушду тавсеаи ҳамкории бисёрҷабҳа бо Иттиҳоди Аврупо таваҷҷуҳи хосса зоҳир менамояд ва робитаҳои устувори дӯстонаро бо Иттиҳоди Аврупо яке аз самтҳои асосии сиёсати хориҷии худ меҳисобад», — тазаккур дод Сарвари давлати Тоҷикистон Эмомалӣ Раҳмон. Ҷонибҳо аз рушди мунтазами муносибатҳои фарогири доираи васеи робитаҳои судманд дар соҳаҳои иқтисодию иҷтимоӣ, гуманитарию фарҳангӣ ва сиёсию амниятӣ изҳори қаноатмандӣ намуда, фаъолияти механизмҳои Иттиҳоди Аврупо, аз ҷумла зарурати тавсеаи Барномаи Иттиҳоди Аврупо барои идоракунии сарҳадот дар Осиёи Марказӣ (БОМКА) ва назорат аз болои маводи мухаддирро (КАДАП) воситаи хуби таҳкими муносиботи ҳамкорӣ арзёбӣ карда буданд.