«ИСТИҚЛОЛ» — ЧЕМПИОН! Пурқувваттарин дастаи футболи шаҳри Душанбе бори ҳафтум ғолиби Чемпионати Тоҷикистон миёни дастаҳои лигаи олӣ гардид

Ноябрь 7, 2018 18:00

ДУШАНБЕ, 07.11.2018 /АМИТ «Ховар»/. Дар даври бистуми Чкмпионат, ки имрӯз, 7-уми ноябр доир гардид, «Истиқлол» дар майдони худ – Варзишгоҳи марказии ҷумҳуриявӣ – бозиро ба ССКА «Помир»-и Душанбе бо ҳисоби 0:1 бохт. Тӯби ягонаро дар дақиқаи 54-ум Шодибек Ғаффоров ба ҳадаф расонид.

Вале ин бохт мавқеи «Истиқлол»-ро дар ҷадвали мусобиқа тағйир надод – дастаи пурқувваттарини пойтахт бо 48 имтиёз барои рақибонаш дастнорас шуд ва қабл аз даври охирини мусобиқа соҳиби медалҳои тилло гардид.

Дастаи «Хуҷанд»-и шаҳри Хуҷанд, ки дар ҷадвал бо 43 имтиёз ҷойи дуюмро касб намудааст, бо медалҳои нуқра мукофотонида мешавад. Хуҷандиҳо дар даври бистум дар меҳмонӣ аз дастаи «Хатлон»-и Бохтар бо ҳисоби 2:4 шикаст хӯрданд.

Дастаи нави лигаи олӣ – «Кӯктош»-и ноҳияи Рӯдакӣ, ки бо 30 имтиёз дар зинаи сеюм ҷойгир шудааст, новобаста аз натиҷаи бозии охиринаш 11-уми ноябр дар меҳмонӣ бо «Хуҷанд» пешакӣ медалҳои биринҷиро азони худ кард. «Кӯктошиҳо» дар даври бистум бозиро 7-уми ноябр дар майдони худ ба «Регар-ТадАЗ»-и Турсунзода бо ҳисоби 1:2 бохтанд.

Боз як бозии даври бистум рӯзи чоршанбе дар варзишгоҳи ба номи Уктам Маматови ноҳияи Ҷалолиддини Балхӣ доир гардид. Дастаи мизбон – «Панҷшер» тими “Барқчӣ”-и Ҳисорро, ки дар зинаи охирин ҷойгир шуд, бо ҳисоби 2:1 шикаст дод.

Чемпионати Тоҷикистон оид ба футбол. Лигаи олӣ

Даври 20-ум

7-уми ноябр (чоршанбе)

«Панҷшер» – «Барқчӣ» — 2:1

Сардовар: Гулмуроди Саъдулло (Душанбе).

Ҷалолиддини Балхӣ, варзишгоҳи ба номи Уктам Маматов

«Истиқлол» – ССКА «Помир» — 0:1

Сардовар: Хусрави Сиддиқзод (Душанбе).

Душанбе, Варзишгоҳи марказии ҷумҳуриявӣ

«Хатлон» – «Хуҷанд» — 4:2

Сардовар: Насрулло Кабиров (Норак).

Бохтар, варзишгоҳи «Пахтакор»

«Кӯктош» – «Регар-ТадАЗ» — 1:2

Сардовар: Сайёдҷон Зайниддинов (Душанбе).

Рӯдакӣ, варзишгоҳи «Нефтяник»

Мавқеи дастаҳо дар ҷадвали мусобиқа

Ҷ	ДАСТАҲО	Б	Ғ	М	Б	Т/Т	И
1	«Истиқлол» (Душанбе)	20	15	3	2	34-16	48
2	«Хуҷанд» (Хуҷанд)	20	13	4	3	39-19	43
3	«Кӯктош» (Рӯдакӣ)	20	9	3	8	30-29	30
4	«Регар-ТадАЗ» (Турсунзода)	20	7	4	9	25-26	25
5	«Хатлон» (Бохтар)	20	7	3	10	24-26	24
6	ССКА «Помир» (Душанбе)	20	5	8	7	21-30	23
7	«Панҷшер» (Ҷалолиддини Балхӣ)	20	4	6	10	16-27	18
8	«Барқчӣ» (Ҳисор)	20	4	1	15	16-32	13