Ғолибони мусобиқаи Ҷоми «Карабао»-2018 миёни кормандони ВАО муайян шуданд

ДУШАНБЕ, 14.11.2018 /АМИТ «Ховар»/. Дар толори Варзишгоҳи «Динамо»-и Вазорати корҳои дохилии Ҷумҳурии Тоҷикистон бозии ниҳоии аввалин мусобиқаи Ҷоми «Карабао»-2018, ки бахшида ба Рӯзи Президент ва ифтитоҳи аввалин агрегати НБО «Роғун»  миёни кормандони ВАО баргузор гардид, доир шуд. Дар ин бозӣ  дастаҳои футболи хурди ТВ «Ҷаҳоннамо» ва ТВ «Варзиш» иштирок намуданд.

Тавре  хабарнигор ва узви дастаи АМИТ «Ховар» Меҳрони Қурбон хабар медиҳад, вохӯрии дастаҳо бо ширкати мухлисони сершумори ин намуди варзиш сурат гирифта, бо пирӯзии дастаи ТВ «Ҷаҳоннамо» бо ҳисоби 4:1 ба ба поён расид. Бояд гуфт, ки дар мусобиқаи Ҷоми «Карабао»-2018  11 дастаи шабакаҳои телевизионӣ ва радио ширкат  намуданд.

Дар фарҷоми мусобиқа ба дастаҳои беҳтарин ҷоизаҳои кумитаи тадорукот тақдим карда шуданд.

Ҳамин тариқ, дастаи  ТВ «Ҷаҳоннамо» соҳиби ҷои якум ва ғолиби мусобиқа дониста шуд. ТВ «Варзиш» соҳиби ҷои дуюм ва медали  нуқра гардида, дастаи «Радиои Имрӯз» ҷои  сеюм ва медали биринҷиро соҳиб шуданд.

Дастаи АМИТ  «Ховар» соҳиби Сипосномаи мусобиқаи Ҷоми «Карабао»-2018 гардид.