Варзишгари навраси тоҷик Сабрина Абророва дар Чемпионати Осиё оид ба шоҳмот дар Тошканд сазовори медали нуқра гардид

ДУШАНБЕ, 26.11.2018 /АМИТ «Ховар»/. Варзишгардухтари   навраси тоҷик  Сабрина Абророва  дар Чемпионати Осиё оид ба шоҳмот миёни наврасон дар шаҳри Тошкенти Ҷумҳурии Ӯзбекистон сазовори ҷои дуюм ва медали нуқра  гардид.

Дар ин бора корманди   Кумитаи кор бо ҷавонон ва варзиши назди Ҳукумати Ҷумҳурии Тоҷикистон Каримҷони  Салимзода ба мухбири АМИТ «Ховар» хабар дод. Зикр шуд, ки Чемпионати Осиё дар Ҷумҳурии Ӯзбекистон миёни наврасон аз 16 то 23 ноябри соли 2018 бо иштироки варзишгарони 11 давлати қораи Осиё доир гардид.

Бояд зикр кард, ки дар ин чемпионат 300 нафар варзишгар байни ҳам рақобат намуда, беҳтаринҳо сазовори ҷойҳои ифтихорӣ гардиданд. Дар миёни 300 нафар  варзишгардухтари навраси тоҷик  Сабрина  Абророва  бо нишон додани беҳтарин малакаю маҳорат сазовори  медали  нуқра гардид ва ба ифтихораш Парчами  давлатии Ҷумҳурии Тоҷикистон боло бардошта шуд.