Низомиддин Зоҳидӣ ва Лю Бин зимни мулоқот таҷрибаи хуби ҳамкории бисёрҷонибаи Тоҷикистону Чинро баррасӣ намуданд

ДУШАНБЕ, 12.12.2018 /АМИТ «Ховар»/.  Муовини якуми Вазири корҳои хориҷии Ҷумҳурии Тоҷикистон  Низомиддин Зоҳидӣ бо Сафири навтаъйини Фавқулода  ва  Мухтори Ҷумҳурии Мардумии  Чин Лю Бин 11 декабр мулоқот анҷом дод.

Тавре ба АМИТ «Ховар» аз Вазорати корҳои хориҷии Ҷумҳурии Тоҷикистон хабар доданд, дар вохӯрӣ ҷонибҳо маҷмӯи масъалаҳои дуҷониба ва рушди ҳамкории мутақобилан судманди ду кишварро дар дурнамои наздик, аз ҷумла дар бахшҳои сиёсӣ, иқтисодиву тиҷоратӣ, энергетика, нақлиёт,   туризм,  фарҳангиву гуманитарӣ мавриди баррасӣ қарор доданд.

Ҷонибҳо инчунин таҷрибаи хуби ҳамкории бисёрҷонибаи Тоҷикистону Чинро дар арсаи байналмилалӣ ва минтақавӣ бо қаноатмандӣ таъкид  намуданд. Дар ин росто дар мавриди баргузории ҳамоишҳои минтақавӣ ва байналмилалӣ дар қаламрави ду кишвар табодули афкор сурат гирифт.

Дар фарҷоми мулоқот муовини якуми вазир ба Сафири навтаъйини кишвари дӯст муваффақиятҳо таманно намуда, изҳори умедворӣ намуд, ки ҳамкории мутақобилан судманд ва ширкатҳои стратегии ду кишвари ҳамҷавор боз ҳам равнақ хоҳанд ёфт.