СОЛИ 2019 МАРДУМИ ТОҶИКИСТОНРО ЧӢ ИНТИЗОР АСТ? Хабарнигорони АМИТ «Ховар» тақвими рӯйдодҳои муҳими соли ояндаро таҳия намудаанд

ДУШАНБЕ, 31.12.2018./АМИТ «Ховар»/. Соли 2018 бо  рӯйдодҳои ниҳоят муҳим ва навгониҳои зиёди хотирмонаш барои мардуми Тоҷикистон ва давлати соҳибистиқлоли мо воқеан таърихӣ буд. Дар ин сол дар пойтахти мамлакат— шаҳри Душанбе баргузории якчанд мулоқоту форум ва ҳамоишҳои дорои аҳамияти минтақавию байналмилалӣ дар сатҳи баланд доир гардиданд.

Соли 2019 низ баргузории чунин ҷамъомаду ҳамоишҳо  идома меёбад. 13 декабри соли 2018 Амри Президенти Ҷумҳурии Тоҷикистон муҳтарам Эмомалӣ Раҳмон ба имзо расид, ки тибқи он дар Ҷумҳурии Тоҷикистон давоми се соли оянда беш аз 30 фестивалу намоиш ва иду озмунҳои анъана ва ҳунарҳои мардумӣ дар сатҳу сифати боз ҳам баландтар доир карда мешаванд. Баргузории қисми зиёди ин чорабиниҳо соли 2019 ба нақша гирифта шудааст.

Солҳои 2019-2021 ба хотири боз ҳам обод кардани Тоҷикистон ва ҳалли масъалаҳои иҷтимоии аҳолӣ бо роҳи беҳтар намудани ифрасохтор, пеш аз ҳама, дар соҳаҳои маорифу тандурустӣ, таъсиси ҷойҳои корӣ, таъмин кардани аҳолии деҳот бо оби босифати ошомиданӣ, бунёду таҷдиди роҳҳои маҳаллӣ, рушди инфрасохтори сайёҳӣ ва инкишофи ҳунарҳои мардумӣ ба талаботи муосир мутобиқ сохтани сатҳи хизматрасонӣ ва баланд бардоштани некуаҳволии мардум дар  ҳар як деҳа ва маҳалли аҳолинишин солҳои рушди деҳот, сайёҳӣ ва ҳунарҳои мардумӣ эълон карда шуданд.

Соли 2019 бо мақсади дастгирии минбаъдаи соҳибкорон дар Ҷумҳурии Тоҷикистон «300 рӯзи ислоҳот оид ба дастгирии соҳибкорӣ ва беҳтар намудани фазои сармоягузорӣ» амалӣ карда мешавад.

Соли 2019 барои бартараф кардани монеаҳои маъмурӣ, таъмин намудани самаранокии хизматрасониҳои давлатӣ ба соҳибкорон бо аҳолӣ лоиҳаи Қонуни Ҷумҳурии Тоҷикистон «Дар бораи хизматрасониҳои давлатӣ» таҳия ва пешниҳод мегардад.

Солҳои 2019-2020 тамоми санҷишҳои фаъолияти субъектҳои соҳибкорӣ дар соҳаҳои истеҳсолӣ манъ карда шуда, муқаррароти Қонуни Ҷумҳурии Тоҷикистон «Дар бораи мораторий ба санҷишҳои фаъолияти субъектҳои соҳибкорӣ дар соҳаҳои истеҳсолӣ» ба ҳамаи мақомоти санҷишу назорат ва ҳифзи ҳуқуқ татбиқ карда мешаванд.

Соли 2019 агрегати дуюми Неругоҳи барқи обии «Роғун» ба истифода дода мешавад. Шурӯъ аз оғози бунёди НБО «Роғун» аз ҳамаи сарчашмаҳои маблағгузорӣ 24 миллиард сомонӣ, танҳо соли 2018 3,9 миллиард сомонӣ аз худ карда шудааст. Соли 2019 ба ин мақсад қариб 4 миллиард сомонӣ пешбинӣ гардида, моҳи апрели соли 2019 агрегати дуюми он ба кор дароварда мешавад.

Соли 2019 таҷдиди НБО «Қайроққум» дар ҳаҷми 1,9 миллиард сомонӣ ва марҳилаи якуми таҷдиди НБО «Норак» ба маблағи 3,5 миллиард сомонӣ оғоз мегардад. Баъди таҷдиди пурра тавоноии ин се неругоҳ нисбат ба ҳаҷми воқеии имрӯзаи онҳо, дар маҷмӯъ, 840 мегаватт афзоиш меёбад.

Танҳо бунёди НБО «Роғун» имкон медиҳад, ки умри НБО «Норак» садсолаҳо дароз карда шавад. Ин чунин маънӣ дорад, ки ба обанбори «Норак» аз неругоҳи «Роғун» оби таҳшиншудаи соф дохил мегардад ва минбаъд обанбори «Норак» аз гилу лой пур намешавад.

Соли 2019  аз ҷониби Ҳукумати мамлакат барои баланд бардоштани музди меҳнати кормандони соҳаҳои буҷетӣ ва нафақа 1,2 миллиард сомонӣ равона мегардад.

Соли 2019 барномаи нави такмили таълими забонҳои русӣ ва англисӣ барои давраи то соли 2030 таҳия ва пешниҳод мегардад.

Солҳои 2019-2021 барномаи нави ислоҳоти судиву ҳуқуқӣ таҳия ва пешниҳод мегардад.

Соли 2019 лоиҳаи Қонуни Ҷумҳурии Тоҷикистон «Дар бораи муқовимат бо экстремизм» таҳия ва ба Ҳукумати мамлакат пешниҳод мегардад.

Соли 2019 лоиҳаи Қонуни Ҷумҳурии Тоҷикистон «Дар бораи мубориза бар зидди коррупсия», ки соли 2005 қабул шудааст, вобаста ба шароити имрӯза дар таҳрири нав таҳия ва пешниҳод мегардад.

Соли 2019 Маҷмааи универсалии варзишӣ, ки дар кӯчаи Карамов сохта шуда истодааст, ба истифода дода мешавад. Бунёди маҷмааи бузургмиқёси варзишӣ дар майдони 10 гектар дар назди боғи фарҳангу фароғатии ба номи Умари Хайём, байни нишебӣ ва теппаҳои Лучоб ва дарёи Душанбе ҷараён дорад.

Дар ин маҷмаа қасрҳои варзишии болопӯшида ва нимпӯшида ва ҳам майдону майдончаҳои гуногун барои теннис, ҳавзҳои хурду миёна ва бузург барои шиноварӣ ва дигар намудҳои варзиши обӣ, ҳамчунин қасри намудҳои варзиши рӯйи ях тибқи навтарин стандартҳои ҷаҳонӣ сохта мешаванд.

Соли 2019 бузургтарин масҷиди Осиёи Марказӣ ба истифода дода мешавад. Лоиҳаи сохтмони Масҷиди марказии ҷомеи шаҳри Душанбе ва иншооти нави Донишкадаи исломии Тоҷикистон  бо дастгирии бевоситаи Президенти Ҷумҳурии Тоҷикистон, ки моҳи октябри соли 2009 дар рӯзҳои таҷлили 1310-солагии Имоми Аъзам ва Соли бузургдошти асосгузор ва пешвои мазҳаби таҳаммулгарои ҳанафӣ ба сохтмони он санги асос гузошта шуда буд,  амалӣ мешавад. Дар як вақт дар масҷид қариб 120 ҳазор нафар тоату ибодат карда метавонанд.

Соли 2019 ба таҷлили Соли бузургдошти фарзанди фарзонаи халқи тоҷик ва шахсияти барҷастаи олами ислом Абӯҳанифа Нӯъмон ибни Собит 10 сол пур мешавад.

Ёдовар мешавем, ки соли 2009 бо ибтикори Президенти Ҷумҳурии Тоҷикистон 1310-солагии асосгузори мазҳаби Ҳанафия — Имоми Аъзам Абӯҳанифа Нӯъмон ибни Собит дар сатҳи баланд таҷлил гардида буд. Дар шаҳри Душанбе дар мавзӯи «Моҳияти таҳаммулпазирии мазҳаби Имоми Аъзам ва вазъи дин дар кишвар» конфронси ҷумҳуриявӣ доир гардида буд, ки дар он Сарвари давлат суханронӣ намуданд. Дар ҷараёни баргузории конфронси ҷумҳуриявӣ аз ҷониби Президенти Ҷумҳурии Тоҷикистон Донишкадаи исломии Тоҷикистон ба номи Имом Аъзам гузошта шуд.

Соли 2019 ҳамаи ташкилоту корхона ва муассисаҳое, ки хизматгузориҳои пулакӣ анҷом медиҳанд, бояд ҳатман қабули пардохтҳоро ба ҳамаи навъҳои хизматрасонӣ бо тартиби ғайринақдӣ тавассути воситаҳои электронии пардохт таъмин намоянд.

Соли 2019 корхонаи истеҳсоли нақлиёти ҷамъиятии мусофирбару боркаш ба кор даромада, дар як сол то 300 автобусу мошинҳои боркаш истеҳсол мекунад.

Соли 2019 ҷашни 28-солагии Истиқлолияти давлатии Ҷумҳурии Тоҷикистон дар Вилояти Мухтори Кӯҳистони Бадахшон доир мегардад.

Соли 2019 дар Тоҷикистон Рӯзҳои фарҳанги бузургмиқёси Ӯзбекистон ва соли 2020 Рӯзҳои фарҳанги Тоҷикистон дар Ӯзбекистон ба нақша гирифта шудаанд.

Соли 2019 дар Осорхонаи Гимеи Париж намоиши нигораҳои таърихии Тоҷикистон баргузор мегардад.

Соли 2019 ширкати Tcell татбиқи тарҳ (лоиҳа)-и бузурги навоваронаро оғоз менамояд. Аснои амалишавии лоиҳа иштирокдорони он 4 ҳадафи бузурги диҷитол, барнома (замима)-ҳои муфиди иҷтимоиро бояд роҳандозӣ намоянд. Тамоми ин барномаҳо бо муҳтавои маҳаллӣ комил гардида, холигоҳи иттилоотиро дар шабакаи ҷаҳонӣ дар бораи Тоҷикистон пур хоҳанд кард.

Яке аз барномаҳо, ки аллакай коркарди он шурӯъ гардидааст, бо номи «Tajik attractions» (аз забони англисӣ – «Манзараҳои тоҷикӣ») мебошад. Дар барнома феҳрасти калони мавзеъҳои таърихӣ, фарҳангӣ, меъморӣ ва табиӣ ҷо хоҳанд ёфт ва дар мавриди ҳар кадоме аз онҳо маълумоти зарурӣ пешниҳод мешавад.

Соли 2019 аз моҳи январ  ва то августи соли 2020 варзишгарони тоҷик ҳар моҳ аз Кумитаи олимпӣ дар ҳаҷми аз 200 то 950 доллар стипендия мегиранд. Бо қарори Кумитаи иҷроияи Кумитаи миллии олимпии Тоҷикистон (КМО ҶТ)  барои омодагирии 15 нафар варзишгарони тоҷик ба Бозиҳои олимпии соли 2020 дар Токио 120 ҳазор доллар маблағ ҷудо мешавад.

Соли 2019 Рӯзҳои фарҳанги Тоҷикистон дар Беларус ва намоиши молу маҳсулоти Тоҷикистон дар Беларус доир карда  мешаванд.

Соли 2019 дастаи футболи «Истиқлол»-и Душанбе бори аввал дар таърихи футболи кишвар дар Лигаи чемпионҳои Осиё, ки бонуфузтарин мусобиқаи қора мебошад, бозӣ мекунад.

Соли 2019 моҳи январ «Нақшаи тадбирҳо оид ба ҳамоҳангсозии амалисозии сиёсати макроиқтисодӣ ва пешгирии хатарҳои имконпазир ба иқтисоди миллӣ» мавриди амал қарор гирифта, нақшаи зиддибуҳрониро, ки Ҳукумат соли 2015 қабул карда буд, иваз менамояд. Нақша бо Қарори Ҳукумат 30 ноябр тасдиқ шуд.

Соли 2019 моҳи январ дастаи мунтахаби наврасони то 17-солаи Тоҷикистон, ки ҳаққи иштирок дар бозиҳои ниҳоии Чемпионати ҷаҳон оид ба футболро ба даст овард, дар шаҳри Мински Ҷумҳурии Беларус дар 15-умин Мусобиқаи байналмилалӣ байни наврасон бо номи «Ҷоми истеъдод-2019»  ширкат меварзад.

Дар мусобиқаи мазкур  12 даста ширкат менамоянд. Ба  ғайр аз Тоҷикистон, инчунин дастаҳои мунтахаби наврасони Беларус, Белгия, Булғория, Гурҷистон, Исроил, Исландия, Литва, Молдова, Словакия, Украина ва Финляндия барои ҷоиза мубориза мебаранд.

Соли 2019 моҳи январ (якшанбеи якум) озмуни ҳунарҳои ороишӣ аз санг дар назар дошта шудааст.

Соли 2019 моҳи январ (якшанбеи дуюм) ҷашни Сада ва намоиши зироати кишоварзӣ бо шукӯҳу шаҳомати хос таҷлил карда мешавад. Ҷашни Сада чун идҳои Наврӯзу Меҳргон яке аз ҷашнҳои басо қадимии аҷдодон буда, дар аҳди қадим хеле мутантану пуршукӯҳ, бо шодию сурур, оташафрӯзию гулханфурӯзиҳо, рақсу тарона ва оростани хони пурнозу неъмат ҷашн гирифта мешудааст. Сада омодагӣ ба кишту кори баҳорист. Хулоса дар Сада деҳқонон ба такопӯ даромада, ба фасли баҳор пурра омодагӣ мегиранд.

Соли 2019 моҳи феврал Рӯзҳои фарҳанги Тоҷикистон дар Арабистони Саудӣ баргузор карда мешаванд.

Соли 2019 моҳи феврал (якшанбеи якум) намоиши ниҳолҳо таҳти унвони «Самараи умри деҳқон» доир карда мешавад.

Соли 2019 моҳи феврал (шанбеи дуюм) Фестивали заргарӣ таҳти унвони «Ҳунар омӯз…» баргузор мешавад.

Соли 2019 моҳи феврал (якшанбеи охир) озмуни дастархонороӣ доир мегардад.

Соли 2019 моҳи апрел ба муносибати Рӯзҳои фарҳанги Ҷумҳурии Тоҷикистон дар Ҷумҳурии Мардумии Чин дар доираи Фестивали байналмилалӣ оид ба сайёҳии иқтисодӣ ва тиҷоратии «Фейерверк-март» Намоиши фарҳангӣ ва ҳунарҳои мардумии Тоҷикистон баргузор карда мешавад.

Соли 2019 моҳи март (шанбеи якум) Фестивали «Чакомаи гесӯ» баргузор карда мешавад. Ёдовар мешавем, ки 9 ноябри соли 2010 дар пойтахти кишвар бо иштироки Президенти Ҷумҳурии Тоҷикистон Эмомалӣ Раҳмон қисмати ниҳоии Фестивали ҷумҳуриявии «Чакомаи гесӯ» баргузор гардида буд.

Иштирокдорони қисмати ниҳоии Фестивали ҷумҳуриявии «Чакомаи гесӯ», ки аксаран духтарону бонувони дорои мӯйҳои дароз ва зебою ороишёфтаанд, бо намоиши барномаи дилнишини фарҳангӣ кӯшиш ба харҷ доданд, ки чор фасли соли табиати биҳиштосои Тоҷикистон, либосу ороишоти миллии занона ва фарҳанги волои рақсу суруди тоҷикиро пешкаши бинандагон намоянд.

Соли 2019 моҳи март (шанбеи охир) Озмуни кадбонуи беҳтарин доир карда мешавад.

Соли 2019 моҳи апрел (якшанбеи якум) озмуни гулҳо- «Сайри гули лола» ба нақша гирифта шудааст. Мақсад аз баргузории «Сайри гули лола» эҳёи суннатҳои ниёгон дар тарғиби ҳисси зебоипарастӣ, ободу зебо гардонидани муҳити зист, талқини хислати гулпарварӣ миёни шаҳрвандон, нигоҳдории арзишҳои табиӣ ва дар ин замина ҷалби сайёҳон ва рушди соҳаи туризм дар Ҷумҳурии Тоҷикистон мебошад

Соли 2019 моҳи апрел (шанбеи охир) Фестивали ҳунарҳои мардумӣ таҳти унвони «Ҳунар беҳ аз зар бувад» доир карда мешавад.

Соли 2019 моҳи май (шанбеи якум) Фестивали «Сад ранги чакан» баргузор мегардад. Ёдовар мешавем, ки Кумитаи ҳифзи мероси фарҳангии ғайримоддии ЮНЕСКО – Идораи илму фарҳанги Созмони Милали Муттаҳид 29 ноябри соли 2018 дар ҷаласаи солонааш дар Маврикий «чакан»- як навъи гулдӯзии тоҷикиро ба Рӯйхати мероси фарҳангии ғайримоддии башарият шомил кард. Тоҷикистон 5 сол боз талош дошт, то ЮНЕСКО чаканро ҳамчун мероси башарият бипазирад.

Соли 2019 моҳи май (якшанбеи дуюм) Озмуни тайёр кардани хӯришҳои миллӣ ва муосир доир карда мешавад.

Соли 2019 моҳи май (якшанбеи охир) Иди асал таҷлил мегардад. Ин ид чанд сол аст, ки дар Тоҷикистон бо шукӯҳу шаҳомати хосса ҷашн гирифта  мешавад. Дар Иди асал беҳтарин занбӯрпарварони мамлакат аз вилоятҳои Суғду Хатлон, минтақаи Рашт ва ноҳияҳои тобеи ҷумҳурӣ навъҳои гуногуни асал, занбӯрҳои асали зинда, гиёҳҳои шифобахш, шириниҳои аз он омода гардида, асбобу лавозимоти парвариш ва ба даст овардани ҳосили асал, инчунин ҳунарҳои дастии мардумиро ба маърази тамошо ва фурӯш мегузоранд.

Соли 2019 моҳи июн (якшанбеи якум) Фестивали атласу адрас доир карда мешавад. Тӯли чанд сол аст, ки дар Тоҷикистон баргузор кардани озмуну фестивалҳои атласу адрас ба ҳукми анъана даромадааст. Мақсади ин фестивалу озмунҳо, пеш аз ҳама, тарғибу ташвиқи либоси миллӣ, тақвияту густариш бахшидан ба истеҳсолу истифодаи анвои гуногуни либосу матоъҳои миллӣ ва рушди атласу адрасбофӣ мебошад.

Соли 2019 моҳи июн (шанбеи дуюм) Озмуни кандакорӣ, гаҷкорӣ, оинабандӣ ва кундалнигорӣ дар назар дошта шудааст.

Соли 2019 моҳи июл (шанбеи якум) Фестивали «Ҷилваи рангҳо: Либосҳои миллӣ ва муосир» баргузор карда мешавад. Сокинон ва меҳмонони Тоҷикистон бори аввал шоҳид ва иштирокчии бевоситаи либосҳои миллӣ ва муосир хоҳанд шуд.

Соли 2019 моҳи июл (якшанбеи охир) Озмуни кулолгарӣ, чӯбтарошӣ ва сабадбофӣ доир мегардад.

Соли 2019 моҳи август (якшанбеи якум) баргузории Фестивали яхмос ва обҳои ташнишикан дар нақша аст.

Соли 2019 моҳи август (якшанбеи дуюм) Озмуни нон ва маҳсулоти нонӣ таҳти унвони «Нон шудам шоистаи ҳар хон шудам» доир карда мешавад.  23  декабри соли 2018 дар майдони назди Маркази савдои «Ёвар»- и шаҳри Душанбе намоиши маҳсулоти нонӣ таҳти унвони «Нон шудам, шоистаи ҳар хон шудам» доир гардида буд, ки дар он занони кадбону аз тамоми  ҷумҳурӣ ҳунари нонпазии хешро пешниҳоди сокинону меҳмонони пойтахт гардониданд.

Соли 2019 моҳи август (якшанбеи охир) Иди каду доир карда мешавад.

Соли 2019 моҳи сентябр (якшанбеи якум) Иди харбузаву тарбуз ҷашн гирифта мешавад. Ин ид бо мақсади ғанӣ гардонидани дастурхони аҳолӣ ва таъмини амнияти озуқавории кишвар доир мегардад. Дар иди харбуза беҳтарин кишоварзони ҷумҳурӣ иштирок намуда, навъҳои беҳтарини харбуза ва тарбузро ба намоиш ва фурӯш мегузоранд.

Соли 2019 моҳи сентябр (шанбеи сеюм) Фестивали таомҳои миллӣ баргузор мегардад. Мақсади он муаррифии фарҳангу маданияти воло, эҳёи ҳунарҳои азбайнрафта ва ба омўзиши касбу ҳунар ҷалб намудани занону духтарон мебошад.

Соли 2019 моҳи сентябр (якшанбеи охир) Озмуни ангур ва дигар анвои меваҷот дар назар дошта шудааст. Дар майдонҳои хоҷагиҳои деҳқонии «Ватан» ва «Ҳоҷӣ Неъмат», ки аз хоҷагиҳои ангурпарвари номдори Тоҷикистон ба ҳисоб мераванд,  парвариши навъҳои ангури хуштамъ бо санъати баланди касбӣ ба роҳ монда шудааст.  Ангурҳои навъи «Ҳусайнии сиёҳу сафед», «Ғалаба», «Шоҳона», «Пешпазак» ва «Кишмиши сиёҳу сафед» дар бозорҳои минтақа талабгорони зиёд доранд.

Соли 2019 моҳи октябр (шанбеи охир) Фестивал-намоиши шолӣ ва биринҷ доир карда мешавад.

Соли 2019 моҳи ноябр (шанбеи якум) Озмуни қаннодӣ ва ҳалвопазӣ баргузор мегардад.

Соли 2019 моҳи ноябр (якшанбеи якум) Фестивали «Оши палав» баргузор мегардад. Мақсад аз баргузории Фестивал- муаррифии фарҳанги дастурхондорӣ, тарғибу ташвиқи ҳунари ошпазӣ, ҳифзи арзишҳои миллӣ ва арҷгузорӣ ба мероси фарҳангии халқи тоҷик мебошад.

Ёдовар мешавем, ки 10 ноябри соли 2018 дар шаҳри Душанбе бори ававл дар як деги азим як тонна оши палав пухта шуд.

Соли 2019 моҳи ноябр (якшанбеи охир) Фестивал-намоиши чорвои зотӣ ташкил карда мешавад. Ин бо мақсади аҳамияти бештар зоҳир намудан ба нигоҳубин ва парвариши чорвои хушзот, афзоиш ёфтани саршумори чорво ва парранда ташкил мегардад. Дар ин рӯз хоҷагиҳои чорводории шаҳру ноҳияҳои ҷумҳурӣ имконияти муаррифӣ кардани намунаи зотҳои беҳтарини чорво, аз ҷумла, чорвои калон ва майдаи шохдор, асп, шутур ва шутурмурғро пайдо мекунанд.

Соли 2019 моҳи декабр (якшанбеи дуюм) баргузории Фестивали бозиҳои миллии варзишӣ ба нақша гирифта шуааст. Соли сеюм аст, ки чунин фестивал дар тамоми ҷумҳурӣ ташкил карда мешавад. Дар доираи фестивали варзишӣ мусобиқаҳо аз рӯи намудҳои гӯштини миллӣ, хурӯсҷанг, чиликдангал, ланкабозӣ, буҷулбозӣ, камонварӣ, камонғӯлак, фалахмонпартоӣ, шоҳмот, ҳойталак, бандкашӣ ва ҳамзамон як қатор намудҳои муосири варзиш- чавгонбозӣ, шиноварӣ, вазнбардорӣ (сангбардорӣ), дастхобонӣ ва пойга доир карда мешаванд.

Соли 2019 моҳи декабр (шанбеи сеюм) Озмуни шириниҳои миллӣ ва муосир ба нақша гирифта шудааст. Фестивал ва озмунҳо дар се давра баргузор карда мешаванд: давраи аввал дар сатҳи маҳалла, деҳа, деҳот ва шаҳракҳо, давраи дуюм – дар сатҳи ноҳия, шаҳр ва вилоятҳо ва давраи ниҳоӣ дар сатҳи ҷумҳурӣ.