Роҳи Хоруғ-Душанбе кушода шуда, роҳҳои Хоруғ-Ишкошим ва Хоруғ-Мурғоб низ рӯзҳои наздик боз мешаванд

Январь 21, 2019 14:10

ДУШАНБЕ, 21.01.2019 /АМИТ «Ховар»/. Тавре қаблан иттилоъ дода будем, роҳи байналмилалии мошингарди Хоруғ-Душанбе бино бар сабаби боридани барфи зиёд ва фаромадани тармаҳои калон баста буд. Бо ҷаҳду талош ва заҳматҳои шабонарӯзии роҳсозони Идораи хоҷагии роҳҳои мошингарди Вилояти Мухтори Кӯҳистони Бадахшон шоми 18 январ ин роҳи байналмилалӣ кушода гардида, ҳаракати корвони мошинҳои мусофирбару боркаш аз ду ҷониб сурат гирифт.

Тавре ба хабарнигори АМИТ «Ховар» аз Идораи хоҷагии роҳҳои мошингарди ВМКБ хабар доданд, дар айни ҳол дар ин масир роҳсозон ба васеъ кардани қисматҳои мушкилгузар аз тармаю барфтӯдаҳо ва кӯҳпораҳои афтида машғули кор мебошанд. Ҳоло роҳҳои Хоруғ-Ишкошим ва Хоруғ-Мурғоб банд буда, рӯзҳои наздик онҳо ҳам кушода хоҳанд шуд.

Ба иттилои манбаъ, аз сабаби нисбатан танг рӯфтани роҳ ронандагони мошинҳои боркаш дар мавзеи Танги ноҳияи Шуғнон дармонда буданд. Дирӯз бо кумаки Вазорати нақлиёти Ҷумҳурии Тоҷикистон роҳҳо васеъ карда шуда, 50 мошини пурбор ҷониби шаҳри Душанбе  раҳсипор шуданд. Корвони мошинҳои пурборро намояндагони Хадамоти давлатии танзим дар соҳаи нақлиёти вилояти Бадахшон то даромадгоҳи ноҳияи Рӯшон бемамониат гусел намуданд.

Мавриди зикр аст, ки боришоти беисти барф ҳафтаи гузашта дар роҳҳои мошингарди ҳудуди ВМКБ дар рафтуомади нақлиёти боркашу мусофирбар мушкилоти зиёд ба миён овард. Аз ҷумла,  роҳи мошингарди «Хоруғ-Ишкошим» бо сабаби  фаромадани 48 тарма банд шуд.

Бино ба зикри манбаъ, дар айни замон роҳи сатҳи ҷумҳуриявии  «Хоруғ-Ишкошим» дар иҳотаи тармаҳо қарор дошта, аз ду ҷониб роҳсозон ба тоза кардани онҳо машғуланд.

Ёдовар мешавем, ки ҳафтае қабл бар асари боридани барф ва фаромадани тармаҳои калон дар километри 574-599-уми роҳи сатҳи байналалмилалии «Хоруғ-Душанбе», дар   ҳудуди ноҳияҳои Рӯшону Шуғнон роҳ баста гардид.

Январь 21, 2019 14:10

Хабарҳои дигари ин бахш

Дар Тоҷикистон Рӯзҳои иммунизатсияи иловагӣ бар зидди бемориҳои сурхча ва гулафшон оғоз гардид
Мутахассисон баланд шудани ҳолати ифлосшавии ҳавои атмосфериро дар Тоҷикистон пешгӯӣ менамоянд
Барои пешгирии бемориҳои зоонозӣ ҷаласа доир карда шуд
Дар Ховалинг ҷаласаи Шурои директорони муассисаҳои таҳсилоти миёнаи касбӣ баргузор гардид
Дар Душанбе оид ба нақши зеҳни сунъӣ дар соҳаи тандурустӣ ҳамоиш доир гардид
МАСЛИҲАТИ МУТАХАССИС. Оё фарзанди шумо барои ба мактаб рафтан омода аст?
Тоҷикистон ва Амрико ҳамкориро дар соҳаи тандурустӣ тақвият медиҳанд
Дар Душанбе доир ба Истиқлоли давлатӣ ҳамчун рукни асосии идеологияи миллӣ ҳамоиши ҳизбиён баргузор шуд
Дар Балҷувон дар мавзуи «Сулҳу субот – омили рушди устувори соҳаи сайёҳӣ» вохӯрии судманд доир гардид
Ҳамкории Тоҷикистон бо Барномаи рушди СММ дар самти ҳифзи ҳуқуқи инсон муҳокима карда шуд
Муовини Сарвазири Тоҷикистон бо сохтмони маҳаллаи навбунёд дар деҳаи Зарангаки ноҳияи Рашт шинос шуд
Нақши занон дар мақомоти олии қонунгузории Тоҷикистон дар даврони соҳибистиқлолӣ назаррас аст