Футбол: имрӯз вохӯрӣ барои Ҷоми олии Тоҷикистон -2019 барпо мегардад

ДУШАНБЕ, 29.03.2019. /АМИТ «Ховар»/. Имрӯз, соати 19:00 дар Варзишгоҳи марказии ҷумҳуриявии шаҳри Душанбе вохӯрӣ барои Ҷоми олии Тоҷикистон-2019 оид ба футбол баргузор мегардад. Дар он чемпиони соли гузашта ва барандаи Ҷоми Тоҷикистон-2018 –«Истиқлол»-и Душанбе ва соҳиби медалҳои нуқраи Чемпионати мамлакат-2018- «Хуҷанд»-и Хуҷанд  бо ҳам қувва меозмоянд.

Мусобиқа барои Ҷоми олии Тоҷикистон аз соли 2010 инҷониб  ба роҳ монда шудааст, ки ҳафт маротиба онро КФ «Истиқлол» (2010, 2011, 2012, 2014, 2015, 2016 ва 2018), як маротибагӣ «Равшан»-и Кӯлоб (2013) ва «Ҳосилот» -и Фархор (2017) ба даст овардаанд.

Барои Ҷоми олии Тоҷикистон «Истиқлол» ва «Хуҷанд» маротибаи сеюм бо ҳам рӯ ба рӯ мешаванд. Дар ду бозии пешина истиқлолиҳо ба пирӯзӣ комёб гардиданд. Ин навбат чӣ? Ба ин савол баъди бозии имрӯза ҷавоб хоҳем гирифт.

Вохӯрии имрӯзаро доварон Гулмуроди Саъдулло-довари ФИФА дар майдон, Ҳасан Каримов ва Вафо Қараев ба ҳайси ёвари довари вохӯрӣ ва Насрулло Кабиров ба ҳайси довари эҳтиётӣ ҳакамӣ мекунанд.

Натиҷаи бозиҳо барои Ҷоми олии Тоҷикистон (2010-2018):

2010 – «Вахш» (Қӯрғонтеппа) – «Истиқлол» (Душанбе) – 0:2

2011 – «Истиқлол» (Душанбе) – «Регар-ТадАЗ» (Турсунзода) – 1:0

2012 – «Истиқлол» (Душанбе) – «Регар-ТадАЗ» (Турсунзода) – 2:1

2013 – «Равшан» (Кӯлоб) – «Регар-ТадАЗ» (Турсунзода) – 2:1

2014 – «Равшан» (Кӯлоб) – «Истиқлол» (Душанбе) – 0:5

2015 – «Истиқлол» (Душанбе) – «Хайр» (Ваҳдат) – 2:2. Аз зарбаҳои пеналти – 4:3

2016 – «Истиқлол» (Душанбе) – «Хуҷанд» (Хуҷанд) – 3:2

2017 – «Истиқлол» (Душанбе) – «Ҳосилот» (Фархор) –1:2

2018 – «Истиқлол» (Душанбе) – «Хуҷанд» (Хуҷанд) – 3:2